వైయస్ జగన్ హైకమాండ్ మాట వినాలి దానం నాగేందర్

హైదరాబాద్‌: తమ కాంగ్రెసు పార్టీ అధిష్ఠానం ఆదేశాలకు అనుగుణంగా నడచుకోవాలని తాము కడప పార్లమెంటు సభ్యుడు వైయస్ జగన్‌కు పదేపదే చెబుతున్నామని మంత్రి దానం నాగేందర్‌ అన్నారు. జగన్‌కు పీసీసీ అధ్యక్ష పదవి ఇవ్వాలా వద్దా అనే విషయాన్ని అధిష్ఠానం నిర్ణయింస్తుందని ఆయన మంగళవారం మీడియా ప్రతినిధులతో చెప్పారు. వైయస్ జగన్ ఓదార్పు యాత్రకు వెళ్లవద్దని పార్టీ అధిష్టానం ఎవరినీ ఆదేశించలేదని ఆయన స్పష్టం చేశారు.

తెలంగాణ రాష్ట్రాన్ని కోరడం దేశద్రోహమని సీమాంధ్ర మంత్రులు చేసిన వ్యాఖ్యలు ప్రజల మనోభావాలను దెబ్బ తీసేవిగా ఉన్నాయని ఆయన అన్నారు. సీమాంధ్ర మంత్రులు తెలంగాణ ప్రజలకు క్షమాపణ చెప్పాల్సిందేనని ఆయన అన్నారు. ఉప ఎన్నికల ఫలితాలు తెలంగాణ సెంటిమెంటుకు అద్దం పడుతున్నాయని ఆయన అన్నారు.