తెలుగుదేశం పక్కా ఆంధ్రోళ్ల పార్టీ: తెరాస నేత చంద్రశేఖర రావు

హైదరాబాద్: తెలుగుదేశం పార్టీపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నిప్పులు చెరిగారు. తెలంగాణ టీడీపీ నేతలు ఆత్మ చంపుకొని ఎన్నాళ్లు ఆ పార్టీలో ఉంటారని ప్రశ్నించారు. టీడీపీ తెలంగాణ పార్టీ కాదని, పక్కా ఆంధ్రా పార్టీ అని వ్యాఖ్యానించారు. తెలంగాణను దోచి ఆంధ్రాకు పెట్టి అక్కడి వారి ప్రయోజనాలను కాపాడే పార్టీ అని ఆరోపించారు. జూనియర్ లెక్చరర్స్ నియామకాల్లో సిటీ కేడర్ కింద పోస్టులు ప్రకటించటంపై..ఇన్‌స్పెక్టర్ల బదిలీలపై..ఆర్డీఎస్‌ను బద్ధలు కొట్టటంపై మాట్లాడనిది మన పార్టీనా?..మన పార్టీ కానే కాదు" అని వ్యాఖ్యానించారు. కరీంనగర్ జిల్లాకు చెందిన టీడీపీ మాజీ ఎమ్మెల్యే మాలెం మల్లేశం, మానకొండూరు జడ్పీటీసీ సభ్యురాలు కోండ్ర స్వరూప, బీజేపీ మహిళా మోర్చా జిల్లా శాఖ అధ్యక్షురాలు జి.పద్మ, పెరిక సంఘం జిల్లా అధ్యక్షుడు జి.చంద్రశేఖర్, రామగుండం-మానకొండూరు నియోజకవర్గాలకు చెందిన టీడీపీ నాయకులు, కార్యకర్తలు పలువురు సోమవారం ఇక్కడ తెలంగాణ భవన్‌లో టీఆర్ఎస్ తీర్థం పుచ్చుకున్నారు. ఈ సందర్భంగా ఆయన మాట్లాడారు.

టీడీపీకి చెందిన తెలంగాణ సీనియర్ నేతలు అనేక మంది తనతో మాట్లాడుతున్నారని, ఢిల్లీకి ఎప్పుడు వెళ్తున్నారని వాకబు చేసి మరీ మంచి రోజు చూసుకొని టీఆర్ఎస్‌లోకి వస్తామంటున్నారని తెలిపారు. ఉప ఎన్నికల సమయంలో తెలంగాణపై వగల ప్రేమ ఒలకబోస్తూ బాబ్లీ నాటకం ఆడిన చంద్రబాబు, ఆర్డీఎస్ తూములు బద్ధలు కొడితే ఎందుకు మాట్లాడటంలేదని ప్రశ్నించారు. లోగడ బాబు సీఎంగా ఉన్నప్పుడు, నందికొట్కూరు ఎమ్మెల్యే బైరెడ్డి రాజశేఖరరెడ్డి ఆర్డీఎస్ తూములను బద్ధలు కొట్టినా స్పందించలేదని దుయ్యబట్టారు. "టీడీపీని తెలంగాణలో పుట్టించింది..పెంచింది మనమే..కాని, అక్కడ జరుగుతున్న అకృత్యాలు భరించలేకనే నేను బయటికి వచ్చాను. ఇప్పుడు మీరు వచ్చారు" అని వ్యాఖ్యానించారు. "డిసెంబర్ 31 తర్వాత తెలంగాణ కోసం మహా భూకంపం సృష్టించి బ్రహ్మాండమైన యుద్ధం చేయాల్సి ఉంది. మీరూ బయటికి రండి. టీడీపీలోనే ఉండి ఆత్మవంచన చేసుకోవద్దు" అని కెసిఆర్ అన్నారు.