జగన్ ఓదార్పు కట్టడికి రంగంలోకి రోశయ్య: బాలినేనికి ఫోన్

హైదరాబాద్: తమ కాంగ్రెసు పార్టీ పార్లమెంటు సభ్యుడు వైయస్ జగన్ ఓదార్పు యాత్రను కట్టడి చేయడానికి ముఖ్యమంత్రి కె. రోశయ్య రంగంలోకి దిగారు. వచ్చే నెల 3వ తేదీ నుంచి ప్రకాశం జిల్లాలో జరిగే జగన్ ఓదార్పు యాత్రలో పాల్గొనవద్దని ఆయన మంత్రులకు, శాసనసభ్యులకు సూచిస్తున్నారు. గనుల శాఖ మంత్రి బాలినేని శ్రీనివాస రెడ్డికి ఆయన గురువారం ఫోన్ చేశారు. ప్రకాశం జిల్లాలో ఓదార్పు యాత్ర ఏర్పాట్లను బాలినేని శ్రీనివాస రెడ్డే దగ్గరుండి పర్యవేక్షిస్తున్నారు. ఆయన అధిష్టానం మాట వినే పరిస్థితి లేదు. అయితే, తన వంతు మాటగా ఓదార్పు యాత్రలో పాల్గొనవద్దని రోశయ్య ఆయన చెప్పినట్లు భావించవచ్చు.

ఓదార్పు యాత్రలో పాల్గొనవద్దనేది తన మాటే కాదని, ఓదార్పు యాత్రకు దూరంగా ఉండాలని కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ కూడా చెప్పారని ఆయన బాలినేనికి సూచించారు. ఓదార్పు యాత్రకు అధిష్టానం వ్యతిరేకంగా ఉందని ఆయన చెప్పారు. మీరు కూడా అధిష్టానం మాట వింటే బాగుంటుందని ముఖ్యమంత్రి రోశయ్య బాలినేనితో చెప్పారు.