నా దారి నాదే, ఓదార్పు యాత్ర ఆగదు: వైయస్ జగన్

హైదరాబాద్: ప్రకాశం జిల్లాలో ఓదార్పు యాత్రను చేపట్టే విషయంలో కాంగ్రెసు కడప పార్లమెంటు సభ్యుడు వైయస్ జగన్ వెనక్కి తగ్గడం లేదు. అధిష్ఠానం సూచించినట్లు నిరాడంబరంగా ఓదార్పు యాత్ర చేపట్టాలని జగన్‌కు నచ్చజెప్పేందుకు ప్రకాశం జిల్లా శాసనసభ్యులు చేసిన ప్రయత్నం విఫలమైంది. సెప్టెంబరు 3 నుంచి ప్రకాశం జిల్లాలో చేపట్టే ఓదార్పు యాత్రలో పార్టీ నాయకులు పాల్గొనవద్దని స్వయంగా కాంగ్రెసు అధ్యక్షురాలు సోనియాగాంధీయే స్థానిక పార్లమెంటు సభ్యులు మాగుంట శ్రీనివాసులురెడ్డి, పనబాక లక్ష్మిలకు చెప్పిన నేపథ్యంలో అధిష్ఠానం మార్గదర్శనం కోసం ప్రకాశం జిల్లాకు చెందిన ఎనిమిది మంది ఎమ్మెల్యేలు ఢిల్లీకొచ్చి జగన్‌ను కలిశారు. మంగళవారం అర్ధరాత్రి ఒంటిగంట వరకూ ఆయన ఇంట్లో కూర్చొని తమ అభిప్రాయాలు చెప్పారు. పార్టీ అధ్యక్షురాలి ఆదేశాలకు వ్యతిరేకంగా యాత్ర చేపడుతున్నందున నియోజక వర్గాల్లో గందరగోళ పరిస్థితి నెలకొందని, పరిస్థితులన్నింటినీ చక్కదిద్ది, అధిష్ఠానం అనుమతితో ఓదార్పుయాత్ర చేపట్టాలని సూచించారు. ఈ సందర్భంగా జగన్‌ కఠినంగా స్పందించారు.

మీ హితబోధలు నాకు అవసరం లేదని, మీ నుంచి పాఠాలు నేర్చుకోవాల్సిన ఆగత్యం పట్టలేదని, నా మనసు మార్చడానికి ప్రయత్నించి సమయం వృధా చేసుకోవద్దని, మీరెంత చెప్పినా తన అభిప్రాయం మారదని, యాత్ర తన వ్యక్తిగతమైందని, తాను ఎవరి మాటా వినాల్సిన అవసరం లేదని జగన్ శాసనసభ్యులపై మండిపడ్డారు. తన యాత్ర వల్ల పార్టీకి నష్టమా, లాభమా అనేది తనకు అవసరం లేదని ఆయన తేల్చి చెప్పినట్లు సమాచారం. యాత్రకు రావాలా, వద్దా అనేది మీరు నిర్ణయించుకోవాలని, రావాలని తాను బలవంతం చేయడం లేదని ఆయన వారితో చెప్పినట్లు తెలుస్తోంది. జగన్ కు శాసనసభ్యులు ఓ నోట్ అందజేశారు.

ఢిల్లీకి జేసీ దివాకర్‌ రెడ్డితో కలిసి ఎందుకు వచ్చారని జగన్‌ అడగ్గా, ఆయన, తాము వేరువేరుగా వచ్చామని ఎమ్మెల్యేలు బదులిచ్చారు. జగన్‌ను కలిసిన వారిలో మహీధర్‌రెడ్డి, ఉగ్రనరసింహారెడ్డి, దగ్గుబాటి వెంకటేశ్వరరావు, ఆమంచి కృష్ణమోహన్‌, గొట్టిపాటి రవి, విజయకుమార్‌, జి.వి.శేషు, సురేష్‌కుమార్‌లు ఉన్నారు. వారు ఉమ్మడిగా రెండు పేజీల నోట్‌ ఆయన చేతికిచ్చారు. వాటిని వారు వివరించబోగా ఆయన వినిపించుకోలేదని సమాచారం. నోట్‌ను మాత్రం ఆమూలాగ్రం చదివారు. ఇవన్నీ తనకు ఎందుకు చెబుతున్నారని ఆయన ఎదురు ప్రశ్న వేశారు.