నిమ్స్ వదిలి స్థానిక కోర్టుకు హాజరైన 'సత్యం' రాజు

హైదరాబాద్‌: సత్యం కంప్యూటర్స్ మాజీ చైర్మన్ బి రామలింగరాజు చాలా రోజులు తర్వాత నిజాం వైద్య విజ్ఞాన సంస్థ (నిమ్స్) నుంచి బయటకు వచ్చారు. వైద్యుల పర్యవేక్షణలో ఆయన మంగళవారం హైదరాబాదులోని నాంపల్లి కోర్టుకు హాజరయ్యారు. సీబీఐ అభియోగాలపై నాంపల్లి ప్రత్యేక కోర్టులో నిందితుల వాదనలు జరగనున్నాయి. అనారోగ్యం కారణంగా చాలాకాలం రామలింగరాజు కోర్టుకు హాజరుకాలేకపోయారు.

గతవారం బెయిల్‌పై విడుదలైన రామలింగరాజు నిమ్స్‌లో చికిత్స పొందుతున్నారు. అయితే ఎక్కువసేపు కోర్టులో కూర్చోలేకపోయిన ఆయన న్యాయమూర్తి అనుమతితో తిరిగి వెళ్లిపోయారు.రామలింగరాజు నిరుడు జనవరి 9వ తేదీన సత్యం కుంభకోణం కేసులో అరెస్టయ్యాడు. అనారోగ్యంతో బాధపడుతున్న ఆయన నిమ్స్ లో చికిత్స పొందుతున్నాడు. డిశ్చార్జీ అయిన తర్వాత తమ ముందు హాజరు కావాలని కోర్టు ఆదేశించింది.