వైయస్ జగన్ కు వీరప్ప మొయిలీ కూడా దూరమే

న్యూఢిల్లీ: కడప పార్లమెంటు సభ్యుడు వైయస్ జగన్ ఏదో మేరకు అనుకూలంగా ఉంటూ వస్తున్న కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ తన వైఖరి మార్చుకున్నారు. ఓదార్పు యాత్ర విషయంలో జగన్ వైఖరిని మార్చేందుకు మొయిలీ తీవ్రంగా ప్రయత్నించారు. అయితే ఫలితం లేకపోవడంతో జగన్‌పై వేటు తప్ప మరో మార్గం లేదని కాంగ్రెస్ అధిష్ఠానానికి సూచించినట్లు తెలుస్తోంది. వైయస్ అనుకూల ముద్రను తొలగించుకోవడానికి ఆయన ప్రయత్నిస్తున్నట్లు సమాచారం. ఆయనలో మార్పు తేవడం కష్టమని మొయిలీతో సహా ఏఐసీసీలో సీనియర్ నేతలందరూ ఒక అభిప్రాయానికి వచ్చినట్లు తెలుస్తోంది. జగన్ విషయంలో మొయిలీ కూడా పార్టీ ఎంపీలతో అహ్మద్ పటేల్ లాగానే మాట్లాడుతున్నట్లు విశ్వసనీయ వర్గాలు తెలిపాయి.

పార్టీని జగన్ మరింత నష్టపరచకుండా త్వరలోనే కీలక చర్యలు తీసుకునేందుకు అధిష్ఠానం నడుంబిగించినట్లు తెలిసింది. ఈ మేరకు సెప్టెంబర్ 3న జగన్ ఓదార్పు యాత్ర ప్రారంభించిన తర్వాత ఏ క్షణంలోనైనా ఆయనకు షోకాజ్ నోటీసు జారీ చేస్తారని పార్టీ వర్గాలు ఇప్పటికే వెల్లడించాయి. అయితే, జగన్‌ను తప్ప శాసనసభ్యులపై అధిష్ఠానం ప్రస్తుతం చర్యలు తీసుకునే అవకాశాలు లేవని ఏఐసీసీ వర్గాలు తెలిపాయి. శాసనసభ్యులను జగన్ కు దూరం చేసేందుకు అధిష్టానం అన్ని విధాలుగా ప్రయత్నిస్తోంది.