చంద్రబాబు నాయుడుపై తెలంగాణ టిడిపి లీడర్ల తిరుగుబాటు?

హైదరాబాద్: తమ పార్టీ అధ్యక్షుడు నారా చంద్రబాబునాయుడిపై తెలుగుదేశం తెలంగాణ నాయకులు తిరుగుబాటుకు సిద్ధమవుతున్నట్లు వార్తలు వస్తున్నాయి. తెలంగాణకు అనుకూలంగా జస్టిస్ శ్రీకృష్ణ కమిటీకి లేఖ ఇవ్వాలంటూ ఆయనపై ఒత్తిడి తెచ్చేందుకు లేఖాస్త్రాలు సంధించాలని నిర్ణయించుకున్నట్లు చెబుతున్నారు. ఎన్ని చెప్పినా తెలంగాణ ప్రజలు తమను విశ్వసించడం లేదని, తెలంగాణ రాష్ట్ర ఏర్పాటుకు అనుకూలంగా ఉన్నామంటూ చంద్రబాబు శ్రీకృష్ణ కమిటీకి లేఖలు ఇస్తే తప్ప ప్రజల విశ్వాసాన్ని పొందలేమని వారు భావిస్తున్నట్లు తెలుస్తోంది. ముగ్గురు తెలుగుదేశం నాయకులు ఇప్పటికే తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో సంప్రదించినట్లు చెబుతున్నారు. కడియం శ్రీహరి, ఎస్ వేణుగోపాలాచారి, సుద్దాల దేవయ్య పలు పార్టీ సమావేశాల్లో చంద్రబాబుతో తమ అభిప్రాయాన్ని కచ్చితంగా చెప్పినట్లు సమాచారం.

పార్టీ సమావేశాల్లో తాము ఎన్ని చెప్పినా చంద్రబాబు దాటవేత ధోరణి అవలంబిస్తున్నారని, దీనివల్ల పార్టీ తెలంగాణలో మరింతగా నష్టపోయే ప్రమాదం ఉందని వారు భావించి, ఏదో ఒకటి చేయాలనే అభిప్రాయానికి వచ్చినట్లు సమాచారం. ఏం చేయాలనే విషయంపై కూడా వారు ఓ నిర్ణయానికి వచ్చారని అంటున్నారు. అందరు కలిసి చంద్రబాబు ఒకే లేఖ రాయాలా, విడివిడిగా లేఖలు సంధించాలా అనే విషయంపై తర్జనభర్జనలు జరుగుతున్నట్లు చెబుతున్నారు. ఏమైనా తెలంగాణ అంశం తెలుగుదేశం పార్టీలో నివుర గప్పిన నిప్పులా ఉంది. అది ఎప్పుడైనా ఎగిసి పడవచ్చునని అంటున్నారు.