రాజమండ్రి వేదికగా వైయస్ జగన్ కొత్త పార్టీ?

హైదరాబాద్: కొత్త రాజకీయ పార్టీ పెట్టేందుకే కాంగ్రెసు కడప పార్లమెంటు సభ్యుడు వైయస్ జగన్ సమాయత్తమవుతున్నట్లు ప్రచారం జరుగుతోంది. రాజమండ్రి వేదికగా ఆయన తన కొత్త పార్టీని ప్రకటించే అవకాశాలున్నట్లు చెబుతున్నారు. ఇందుకు తగిన ఏర్పాట్లు కూడా జరుగుతున్నట్లు తెలుస్తోంది. పార్టీకి సంబంధించిన బ్యానర్లు, ఇతర సామగ్రి రాజమండ్రిలో తయారవుతున్నట్లు సమాచారం. ఈ విషయంపై నిఘా విభాగం అధికారులు రాజమండ్రిలో ఆరా తీశారు. నిఘా విభాగం అధికారులు ఆరా తీసిన విషయాన్ని బ్యానర్లు తయారు చేసే వ్యక్తి ఒకరు ధ్రువీకరించారు. తమ వద్ద జగన్ ఓదార్పు యాత్రకు సంబంధించిన బ్యానర్లు తయారవుతున్నాయని, పార్టీ బ్యానర్లు తయారు కావడం లేదని ఆయన అన్నారు.

సెప్టెంబర్ 4వ తేదీన వైయస్ జగన్ తన పార్టీని రాజమండ్రిలో ఆవిష్కరిస్తారని అంటున్నారు. సెప్టెంబర్ 2వ తేదీన తిరుపతిలో వైయస్ సంస్మరణ సభ జరుగుతుంది. సెప్టెంబర్ 3వ తేదీ నుంచి ప్రకాశం జిల్లాలో ఓదార్పు యాత్ర ఉంది. ఓదార్పు యాత్ర మధ్యలో వచ్చి రాజమండ్రిలో పార్టీని ఆవిష్కరిస్తారా, ప్రకాశం జిల్లా ఓదార్పు యాత్రను వాయిదా వేసుకుని పార్టీ ఆవిర్భావ కార్యక్రమాన్నే ప్రధానం చేసుకుంటారా అనేది తెలియడం లేదు. అయితే, పార్టీ అధిష్టానం తనపై చర్యలు తీసుకోవడానికి అనుగుణంగా జగన్ తన కార్యక్రమాన్ని మార్చుకోవచ్చునని అంటున్నారు. పార్టీ అధిష్టానం చర్యలు తీసుకునే వరకు నిరీక్షించాలనే ఆలోచన కూడా జగన్ వర్గంలో ఉంది. దాన్ని సానుభూతిగా మలుచుకుని కొత్త పార్టీకి శ్రీకారం చుట్టాలనే ఆలోచనలో ఉంది.

పార్టీ అధిష్టానం ఈలోపలే చర్యలకు దిగవచ్చుననే ఉద్దేశంతో అవసరమైతే సెప్టెంబర్ 4వ తేదీన పార్టీకి శ్రీకారం చుట్టేందుకు కూడా ఏర్పాట్లు జరుగుతున్నాయి. గత రెండు మూడు రోజుల పరిణామాలను బట్టి చూస్తే జగన్ పై చర్య విషయంలో జాప్యం చేయకూడదనే ఉద్దేశంతో కాంగ్రెసు అధిష్టానం ఉన్నట్లు తెలుస్తోంది.