సీమాంధ్ర లెక్చరర్లపై ఉస్మానియా విశ్వవిద్యాలయంలో దాడి

హైదరాబాద్: సీమాంధ్ర అధ్యాపకులపై హైదరాబాదులోని ఉస్మానియా విశ్వవిద్యాలయంలో దాడి సంచలనం సృష్టించింది. అధ్యాపకులపై దాడికి సీమాంధ్రలో నిరసన పెల్లుబుకింది. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు, తెలంగాణ జెఎసి చైర్మన్ కోదండరామ్ దిష్టిబొమ్మలను దగ్ధం చేశారు. సీమాంధ్ర నాయకులు దాడిని తీవ్రంగా ఖండించారు. దాడిని ఉన్నత విద్యాశాఖ మంత్రి శ్రీధర్ బాబు వ్యతిరేకించారు. దాడిపై గవర్నర్ నరసింహన్ వైస్ చాన్సలర్ నుంచి నివేదిక కోరారు. బీఈడీ స్పాట్ వాల్యూయేషన్ నిర్వహిస్తున్న కేంద్రం వద్ద ఆందోళనకు దిగిన విద్యార్థు లు పరీక్షా పత్రాలు దిద్దేందుకు వచ్చిన సీమాంధ్ర ప్రాంత అధ్యాపకులపై దాడి చేశారు. వారిని తరిమారు.

"సీమాంధ్ర అధ్యాపకులు వాల్యూయేషన్ చేయరాదు..వారి వాల్యూయేషన్ ‌లో మోసం, కుట్ర ఉంది. ఇక్కడి విద్యార్థులపై కక్ష పెట్టుకున్నారు. తెలంగాణ విద్యార్థుల పరీక్షా పత్రాలను తెలంగాణ అధ్యాపకులే దిద్దాలి" అంటూ పెద్ద ఎత్తున నినాదాలు చేశారు. ఈ పరిణామాలతో అక్కడ దాదాపు గంటన్నర సేపు తీవ్ర ఉద్రిక్తత నెలకొంది. వ్యాల్యుయేషన్ కేంద్రం నుంచి సీమాంధ్ర అధ్యాపకులు వెళ్లిపోవాలని వారు డిమాండ్ చేశారు. ఈనెల 30లోగా సీమాంధ్ర అధ్యాపకులను పంపించకుంటే తామే తరిమేస్తామని విద్యార్థులు హెచ్చరించారు. తెలంగాణ ప్రాంత అధ్యాపకుల చేతనే తమ ప్రశ్నాపత్రాలను దిద్దించాలని విద్యార్థి నేతలు డిమాండ్ చేశారు. ఇదిలా ఉండగా విశ్వవిద్యాలయం ఆదేశాల ప్రకారమే తాము వాల్యూయేషన్ కోసం ఇక్కడికి వచ్చామని పలువురు అధ్యాపకులు తెలిపారు. తమపై దాడి చేయటం అన్యాయమంటూ ఆవేదన వ్యక్తం చేశారు.