వైయస్ హెలికాప్టర్ ప్రమాదంపై మళ్లీ సాక్షి డైలీ డౌట్స్

దివంగత నేత వైయస్ రాజశేఖర రెడ్డి హెలికాప్టర్ ప్రమాదంపై కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రిక సందేహాలు వ్యక్తం చేస్తూ మళ్లీ వార్తాకథనాన్ని ప్రచురించింది. ఆఖరి ప్రయాణం అదే మిస్టరీ, మహానేత మరణించి ఏడాదైనా వీడని అనుమానాలు అంటూ పతాక శీర్షికన ఆ వార్తాకథనాన్ని ప్రచురించింది. విద్రోహం వైపే వేలు చూపుతున్న శేష ప్రశ్నలు అంటూ వ్యాఖ్యానించింది. దర్యాప్తు సంస్థల తీరును కూడా సాక్షి దినపత్రిక తప్పు పట్టింది. కుట్ర జరిగిందేమోననే అనుమానం వదిలేసి, కుట్ర జరగలేదని తేల్చడానికే దర్యాప్తు సంస్థలు ప్రయత్నించాయని విమర్శించింది. ప్రమాదం జరగడానికి ముందే హెలికాప్టర్ క్యుమలోనింబస్ మేఘాలను దాటినట్లు వాతావరణ చిత్రాలు చెబుతున్నాయని, సిబిఐ మాత్రం క్యుములోనింబస్ మేఘాల వల్లనే హెలికాప్టర్ కూలిపోయి ఉండవచ్చునని అభిప్రాయపడిందని వ్యాఖ్యానించింది.

సివిఆర్ లో పైలట్, కో - పైలట్ మాటలే ఉన్నాయనీ అంటూ వైయస్, ఆయన చీఫ్ సెక్యూరిటీ ఆఫీసర్..ఎవరి మాటల్ూ ఎందుకు రికార్డు కాలేదని సాక్షి దినపత్రిక ప్రశ్నించింది. సివిఆర్ ట్యాంపరింగ్ జరిగిందా అనే సిబిఐ ఎందుకు దృష్టి పెట్టలేదని అడిగింది. కీలకమైన నాలుగు నిమిషాల పాటు అసలు మాటలు ఎందుకు రికార్డు కాలేదని సాక్షి దినపత్రిక అడిగింది. ఆగస్టాను సిద్ధంగా ఉంచకపోవడంపై అనేక అనుమానాలున్నాయని, కుట్రతో రికార్డులు తారుమారై ఉండవచ్చన్న కోణం సిబిఐకి పట్టలేదని విమర్శించింది. ప్రమాద స్థలంలో ఆరు బుల్లెట్లే దొరికాయని, మిగతా నాలుగు బుల్లెట్ల సంగతేమిటని సాక్షి దిన పత్రిక ప్రశ్నించింది.