వైయస్సార్ ను మరిచే మూర్ఖలమా: సిఎం రోశయ్య

హైదరాబాద్: వైయస్ రాజశేఖర రెడ్డిని మరిచిపోయారంటూ గోల చేసిన యువజన కాంగ్రెసు కార్యకర్తలపై ముఖ్యమంత్రి కె. రోశయ్య తీవ్రంగా మండిపడ్డారు. జగన్ వర్గానికి చెందిన కొంత మంది కార్యకర్తలు ముఖ్యమంత్రి ప్రసంగానికి అడ్డు తగిలే ప్రయత్నం చేశారు. ఆయన ఆదివారం రంగారెడ్డి జిల్లా అబ్దుల్లాపూర్‌మెట్‌ వద్ద జేఎన్‌ఎన్‌యూఆర్‌ఎం గృహ సముదాయాలను ప్రారంభించారు. ఈ సందర్భంగా ఏర్పాటు చేసిన సమావేశానికి యువజన కాంగ్రెస్‌ కార్యకర్తలు కొందరు ఆటంకం కలిగించడంతో రోశయ్య అసహనానికి లోనయ్యారు. ఈ సమావేశంలో కేంద్ర మంత్రు జైపాల్ రెడ్డి, శెల్జాలతో పాటు పలువురు రాష్ట్ర మంత్రులు పాల్గొన్నారు.

వైయస్ సేవలను మరచిపోయే మూర్ఖులం, దుర్మార్గులం కాదు. ఇలాంటి చేష్టల వల్ల పరలోకంలో ఉన్న ఆయన ఆత్మకు శాంతి చేకూరదు. ఆయన బతికున్నా ఇలాంటి కోరికలను కోరేవారు కాదేమో.." అని ముఖ్యమంత్రి రోశయ్య యువజన కాంగ్రెస్‌ కార్యకర్తలపై తీవ్ర ఆగ్రహం వ్యక్తం చేశారు. మంత్రి దానం నాగేందర్ కూడా యువజన కాంగ్రెసు కార్యకర్తలపై తీవ్రంగా మండిపడ్డారు. "ఏయ్‌.. యూత్‌ కాంగ్రెస్‌..బుద్దుందా? ఇలా రాజకీయం చేసే పాడు చేసుకుంటుండ్రు..బుద్దుండాలి..తమాషా చేస్తున్నారా? ఇలా చేస్తే యూత్‌ కాంగ్రెస్‌ నుంచి సస్పెండ్‌ చేస్తా" అంటూ ఆగ్రహంతో ఊగిపోయారు. చివరకు పోలీసులు జోక్యం చేసుకొని నిరసనకారులను శాంతింపజేశారు. రాహుల్, జగన్ చిత్రపటాలున్న ప్లకార్డులను ప్రదర్శిస్తూ వారు గొడవకు దిగారు.