తెలంగాణ విద్యార్థులపై కేసులు: చేతులెత్తేసిన చిదంబరం

న్యూఢిల్లీ: ఉద్యమం సందర్భంగా తెలంగాణ విద్యార్థులపై పెట్టిన కేసుల ఉపసంహరణపై కేంద్ర హోం మంత్రి పి. చిదంబరం చేతులెత్తేశారు. విద్యార్థులపై కేసులు ఎత్తేస్తామని గతంలో హామీ ఇచ్చిన ఆయన కేసుల ఎత్తివేత తన పరిధిలో లేదని బుధవారం మీడియా ప్రతినిధుల సమావేశంలో తేల్చేశారు. కేసుల ఎత్తివేత వ్యవహారం రాష్ట్ర ప్రభుత్వ పరిధిలోనిదని ఆయన అన్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు, తెలంగాణ పార్లమెంటు సభ్యులు ఈ విషయంలో తనను కలిశారని, అయితే ముఖ్యమంత్రి రోశయ్యను సంప్రదించాలని తాను వారికి సూచించానని ఆయన చెప్పారు. కేసుల ఎత్తివేత విషయంపై తాము రాష్ట్ర ప్రభుత్వానికి చెప్పామని ఆయన అన్నారు.

రాష్ట్ర ప్రభుత్వం కోరితే మావోయిస్టు నేత ఆజాద్ ఎన్ కౌంటర్ పై సిబిఐ విచారణకు ఆదేశించేందుకు తాము సిద్ధంగా ఉన్నామని ఆయన చెప్పారు. పౌర హక్కుల సంఘాల నాయకులు ఆంధ్రప్రదేశ్ ప్రభుత్వం అందుకు ఒత్తిడి తేవచ్చునని ఆయన అన్నారు. నక్సల్స్ ప్రభావిత ప్రాంతాల్లో పారా మిలిటరీ బలగాలను పెంచుతామని ఆయన చెప్పారు. కాషాయ ఉగ్రవాదంపై తాను చేసిన వ్యాఖ్యకు ఇప్పటికీ కట్టుబడి ఉన్నట్లు ఆయన తెలిపారు. కాశ్మీర్ సమస్యపై అన్ని పక్షాలతో చర్చలు జరుపుతామని ఆయన చెప్పారు.