వైయస్ జగన్ ఓదార్పుపై ప్రభుత్వానికి హైకోర్టు నోటీసు

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్రుపై రెండు వారాల్లోగా సమాధానం ఇవ్వాలని రాష్ట్ర హైకోర్టు ప్రభుత్వాన్ని ఆదేశించింది. ఈ మేరకు ప్రభుత్వ ప్రధాన కార్యదర్శి, హోంశాఖ ప్రత్యేక కార్యదర్శి, డిజిపిలకు హైకోర్టు నోటీసులు జారీ చేసింది. ఓదార్పు యాత్ర వల్ల సామాన్యుడికి ఇబ్బందులు కలుగుతున్నాయని, దాన్ని నియంత్రించి, కాలవ్యవధి నిర్దేశించేలా ప్రభుత్వాన్ని ఆదేశించాలని కోరుతూ దివంగత ఐపియస్ అధికారి ఉమేష్ చంద్రకు మామ అయిన తూర్పు గోదావరి జిల్లావాసి ఎఁ కృష్ణారావు పిటిషన్ దాఖలు చేశారు. దానిపై హైకోర్టు విచారణ జరుపుతోంది.

ఒక పార్లమెంటు సభ్యుడు వ్యక్తిగత యాత్రకు పోలీసులు భద్రత కల్పిస్తూ పోతే ఇతర నిర్వహించడం సాధ్యం కాదని, యాత్రకు మార్గదర్శకాలను జారీ చేసేలా ఆయా జిల్లా పాలనాధికారులకు ప్రభుత్వం ఆదేశాలు ఇవ్వాలని పిటిషనర్ తరఫు న్యాయవాది ఐవి రాధాకృష్ణ మూర్తి అన్నారు. యాత్ర ఉదయం పది గంటల నుంచి సాయంత్రం నాలుగు గంటల వరకు నిర్వహించుకునేలా చూడాలని ఆయన కోరారు. ఓదార్పు యాత్ర వల్ల ట్రాఫిక్ ఇబ్బందులు ఏర్పడి విద్యార్థులు, ఉద్యోగులు సకాలంలో విద్యాసంస్థలకు, కార్యాలయాలకు చేరుకోలేకపోతున్నారని రాధాకృష్ణ మూర్తి అన్నారు.