ఎపిపిఎస్సీ పరీక్షలపై సచివాలయం ముట్టడి: విద్యార్థుల అరెస్టు

హైదరాబాద్‌: ఎపిపిఎస్సీ గ్రూప్‌-1 పరీక్షల వాయిదా కోరుతూ ఏబీవీపీ కార్యకర్తలు శుక్రవారం సచివాలయం ముట్టడికి యత్నించారు. ఎన్టీఆర్‌ ఘాట్‌ వద్దే పోలీసులు ఏబీవీపీ కార్యకర్తల్ని అడ్డుకొని అరెస్టు చేశారు. ఏబీవీపీ నిరసన వల్ల సచివాలయం పరిసర ప్రాంతంలో ట్రాఫిక్‌ స్తంభించింది. సచివాలయం వద్ద భారీగా పోలీసులు మోహరించారు. ఎబివిపి విద్యార్థులు విడతలు విడతలుగా వచ్చి సచివాలయ ముట్టడికి ప్రయత్నించారు. ఈ సమయంలో తీవ్ర ఉద్రిక్తత నెలకొంది.

ఇదిలాఉండగా గ్రూప్‌-1లో తెలంగాణ వాటా కోసం ఏపీపీఎస్సీ కార్యాలయం వద్ద తెలంగాణ ఉద్యమ ఐకాస ధర్నా చేపట్టింది. ఎపిపిఎస్సీ గ్రూప్ -1లో తెలంగాణ వాటా తేల్చిన తర్వాతనే పరీక్ష నిర్వహించాలని ఎబివిపి కార్యకర్తలు డిమాండ్ చేశారు. ఎపిపిఎస్సీ చైర్మన్ గా వెంకట్రామిరెడ్డిని తొలగించాలని కూడా వారు డిమాండ్ చేశారు. తెలంగాణకు 42 శాతం వాటా కేటాయించాలని విద్యార్థులు కోరుతున్నారు.

గ్రూప్‌ - 1 పరీక్షల నిర్వహణపై చర్చించేందుకు ఏపీపీఎస్సీ అత్యవసరంగా సమావేశమైంది. ఇప్పటికే రెండుసార్లు వాయిదా పడిన గ్రూప్‌-1 ప్రిలిమినరీ పరీక్షను ఈసారి తప్పకుండా నిర్వహించాలని అభ్యర్థులు కోరుతున్నారు. ఈ నెల 5వ తేదీన గ్రూప్ -1 పరీక్ష నిర్వహించడానికే ఎపిపిఎస్సీ కట్టుబడి ఉన్నట్లు చెబుతున్నారు. ఈ పరీక్ష సందర్భంగా తెలంగాణ రాజకీయ జెఎసి, ఒయు జెఎసి ఈ నెల 5వ తేదీన తెలంగాణ బంద్ కు పిలుపునిచ్చాయి.