వైయస్ జగన్ రావాల్సిందేనంటూ ఒంటిపై కిరోసిన్...

ఎర్రగోండపాలెం: జగన్ తమ గ్రామానికి రావడం లేదన్న ఆవేదనతో కొందరు మహిళలు కిరోసిన్ పోసుకోని ఆత్మహత్యాయత్నానికి ఒడిగట్టారు. ప్రకాశం జిల్లా ఎర్రగోండపాలెం మండలం అమానుగుడిపాడు ఎస్సీ కాలనీలో గుండెపోటుతో మరణించిన మందా నాగయ్య కుటుంబాన్ని జగన్ శనివారం రాత్రి పరామర్శించారు. ఈ సందర్భంగా పందివానిపల్లె, గుర్రపుశాల, కొలుకుల గ్రామాలకు చెందిన పురుషులు, మహిళలు నాలుగు ట్రాక్టర్లలో అమానుగుడి చేరుకున్నారు. తమ గ్రామాల్లో వైఎస్ఆర్ విగ్రహావిష్కరణకు రావాలని పట్టుబట్టారు. దీంతో సుమారు 300 మంది మహిళలు సహా 700 మంది జగన్ కాన్వాయ్ ను అడ్డుగా కూర్చుండిపోయారు.

మావోయిస్టు ప్రభావిత ప్రాంతం కావడంతో అటువైపు వెళ్లోద్దని జగన్ కు పోలీసులు సూచించారు. అయితే తమ గ్రామాలకు వచ్చి తీరాల్సిందేనని గ్రామస్తులు పట్టుబట్టారు. ఇలా సుమారు గంటపాటు కాన్వయ్ ఆగిపోగా ఆరుగురు మహిళలు ఒంటిపై కిరోసిన్ పోసుకున్నారు. పోలీసులు, స్దానిక పెద్దలు వారిని అడ్డుకున్నారు. ఎమ్మేల్యే బుచేపల్లి శివప్రసాద్ రెడ్డి కారు దిగి మీరు కోరిన విధంగా జగన్ వస్తారని చెప్పడంతో వారు శాంతించారు. అనంతరం ఆ గ్రామాలకు యువనేత వెళ్శి విగ్రహాలను ఆవిష్కరించారు.