పగిడిపల్లి రైల్వే స్టేషన్ మేనేజర్ ఆఫీసుపై ప్రయాణికుల దాడి

నల్లగొండ: నల్లగొండ జిల్లా పగిడిపల్లి రైల్వే స్టేషన్ మేనేజర్ కార్యాలయంపై ప్రయాణికులు దాడి చేశారు. పగిడిపల్లిలో పుష్ పుల్ రైలు ఆగిపోయింది. దీంతో సిగ్నల్ సాకుతో రైలును గంటల తరబడి ఆపుతున్నారంటూ ప్రయాణికులు తీవ్ర ఆగ్రహానికి గురయ్యారు. ఆ ఆగ్రహంతో వారు రైల్వే స్టేషన్ మేనేజర్ కార్యాలయంపై రాళ్లతో దాడి చేశారు. ప్రయాణికుల ఆగ్రహాన్ని గమనించిన మేనేజర్ పారిపోయాడు.

ప్రయాణికుల దాడిలో మేనేజర్ కార్యాలయం అద్దాలు, ఫర్నీచర్ ధ్వంసమయ్యాయి. ఈ ఘటనతో నల్లగొండ జిల్లాలోని పగిడిపల్లి మార్గంలోని రైళ్ల రాకపోకలకు తీవ్ర అంతరాయం ఏర్పడింది. నల్లగొండ జిల్లా భువనగిరిలో కాకతీయ ఎక్స్ ప్రెస్ నిలిచిపోయింది. దాడి తర్వాత మేనేజర్ కార్యాలయం వద్ద ప్రయాణికులు ధర్నాకు దిగారు. పరిస్థితి ఉద్రిక్తంగా ఉంది.