తిరుపతిలో తెలుగుదేశం అధినేత చంద్రబాబుకు అవమానం

తిరుపతి: తెలుగుదేశం పార్టీ అధ్యక్షుడు నారా చంద్రబాబునాయుడికి తిరుపతిలో అవమానం జరిగింది. పద్మావతి అతిథి గృహంలో చంద్రబాబు మీడియా సమావేశానికి తిరుమల తిరుపతి దేవస్థానం (టిటిడి) అధికారులు బుధవారం ఆంక్షలు విధించారు. రాజకీయ నాయకుల మీడియా సమావేశాలకు పద్మావతి అతిథి గృహంలో అనుమతి ఇవ్వబోమని టిటిడి అధికారులు చెప్పారు. చంద్రబాబును అవమానించేందుకే టిటిడి ఆంక్షలు విధించిందని తెలుగుదేశం పార్టీ కార్యకర్తలు ఆగ్రహం వ్యక్తం చేస్తున్నారు.

ప్రజాసమస్యలను ప్రభుత్వం దృష్టికి తీసుకురావడం రాజకీయం ఎలా అవుతుందని చంద్రబాబు అంతకు ముందు ప్రశ్నించారు. అలిపిరి ఘటనలో కోర్టుకు హాజరయ్యేందుకు ఆయన తిరుపతి చేరుకున్నారు. ఎరువులన్నీ మిక్సర్‌ ప్లాంట్లకు తరలిపోతున్నా ముఖ్యమంత్రి ప్రతిపక్షాలని రాజకీయ చేస్తున్నారనడం దారుణమని అన్నారు. రైతుల సమస్యలు తీర్చడంలో ఏ పార్టీతోనైనా కలసి పోరాటం చేయడానికి సిద్ధమని చంద్రబాబు తెలిపారు. ఎరువుల కొరతపై రాజీలేని పోరాటం చేస్తామని వెల్లడించారు.