ప్రభుత్వాన్ని కూల్చేందుకు కెవిపి రామచందర్ రావు కుట్ర

హైదరాబాద్: ముఖ్యమంత్రి కె. రోశయ్య ప్రభుత్వాన్ని కూల్చేందుకు కాంగ్రెసు పార్టీ రాజ్యసభ సభ్యుడు, దివంగత నేత వైయస్ రాజశేఖర రెడ్డి ప్రియ మిత్రుడు కెవిపి రామచందర్ రావు కుట్ర చేస్తున్నారా? అవునంటున్నారు అదే పార్టీకి చెందిన తెలంగాణ పార్లమెంటు సభ్యుడు మధు యాష్కీ. మరో తెలంగాణ పార్లమెంటు సభ్యుడు జి. వివేక్ తో కలిసి ఆయన శుక్రవారం కెవిపి రామచందర్ రావుపై తీవ్రంగా విరుచుకుపడ్డారు. రోశయ్య ప్రభుత్వాన్ని కూల్చేందుకు కెవిపి రామచందర్ రావు కుట్ర చేస్తున్నారని ఆరోపించారు.

రోశయ్య ఆరోగ్యంపై కెవిపి రామచందర్ రావు ఢిల్లీలో తప్పుడు ప్రచారం సాగిస్తున్నారని మధు యాష్కీ నిప్పులు చెరిగారు. అంతేకాకుండా అడ్వొకేట్ జనరల్ తో కేంద్ర ప్రభుత్వానికి కెవిపి రామచందర్ రావు తప్పుడు నివేదికలు అందిస్తున్నారని కూడా ఆరోపించారు. సీమాంధ్ర వైఖరి వల్లనే తెలంగాణ న్యాయవాదులు ఆందోళనకు దిగాల్సి వచ్చిందని ఆయన అన్నారు. న్యాయవ్యవస్థలో తెలంగాణ వాటాపై రాష్ట్ర మంత్రి జె. గీతారెడ్డి తప్పుడు నివేదిక అందించారని వివేక్ విమర్సించారు. గీతారెడ్డికి సరైన నివేదిక అందిస్తామని ఆయన చెప్పారు.