ఆ ముగ్గురు మంత్రులపై నిజామాబాద్ ఎంపీ మధు యాష్కీ ఫైర్

హైదరాబాద్: తెలంగాణ కోసం చిత్తశుద్ధితో పోరాడుతున్న తమపై మంత్రులు విమర్శలు చేయడంపై నిజామాబాద్ ఎంపీ మధుయాష్కీ మండిపడ్డారు. తెలంగాణ పట్ల ఏమాత్రం స్పష్టత లేకుండా కొందరు మంత్రులు, ఎమ్మెల్యేలు ఉన్నారని వారు మొదట తెలంగాణపై స్పష్టమైన వైఖరి ప్రకటించిన తర్వాత తమను విమర్శించాలన్నారు. తెలంగాణపై తెలంగాణ రాష్ట్ర అధ్యక్షుడు కె.చంద్రశేఖరరావు చిత్తశుద్ధితో పోరాడుతున్నందునే తాము ఆయనను సమర్థిస్తున్నామన్నారు. అలా చేస్తే కాంగ్రెసు కు వచ్చే నష్టమేమీ లేదన్నారు. ఎందుకంటే తెలంగాణ ప్రజలందరూ ప్రత్యేక రాష్ట్రాన్ని కోరుకుంటున్నారని వారికి అనుగుణంగా నడుచుకోవాల్సిన అవసరం మనకు, పార్టీకి ఉందని ఆయన సూచించారు.

వైఎస్ చనిపోతే జగన్ ను ముఖ్యమంత్రిని చేయాలని అధిష్టానం చుట్టూ ప్రదక్షిణలు చేసిన వారు ఇప్పుడు ఎంపీలపై విరుచుకు పడటం హాస్యాస్పదం అన్నారు. చిన్నప్పటి నుంచి రాజకీయాల్లోనే ఉన్నామని, తాము రాజకీయాల్లో ఉన్నారనే విషయం వారికి తెలియకుంటే మేమేమీ చేయలేమని అన్నారు. హై కమాండ్ ముందుకు వెళదామని తప్పు ఎవరిదో అక్కడే తేల్చుకుందామని హెచ్చరించారు. తెలంగాణకు మీరు అనుకూలంగా ఉన్నట్టయితే మీరు ముందు నడిస్తే మేము ప్రోత్సహించడానికి సిద్ధంగా ఉన్నామన్నారు. తెలంగాణ విషయంలో కేసీఆర్, కాంగ్రెసు అని కాకుండా అందరినీ ప్రోత్సహిస్తామన్నారు.