వోక్స్ వ్యాగన్ కేసులో బొత్స సత్యనారాయణకు ఊరట

హైదరాబాద్: వోక్స్ వ్యాగన్ కేసులో రాష్ట్ర మంత్రి బొత్స సత్యనారాయణకు ఊరట లభించింది. జర్మన్ కంపెనీ వోక్స్ వ్యాగన్ కోసం వశిష్టవాహన్ అనే సంస్థకు 11 కోట్ల రూపాయలు చెల్లించిన కుంభకోణంలో సిబిఐ మంత్రిపై ఏ విధమైన అభియోగాలు మోపడం లేదు. ఈ కేసులో నలుగురిపై సిబిఐ అభియోగాలు మోపింది. జైన్, అళగ రాజా, గాయత్రి, వశిష్టవాహన్ సిఇవో సూష్టర్ లపై సిబిఐ అభియోగాలు మోపింది. విశాఖపట్నంలో కార్ల ఫ్యాక్టరీ స్థాపనకు వోక్స్ వ్యాగన్ కు మధ్యవర్తిగా వ్యవహరిస్తున్న వశిష్ట వాహన్ కు రాష్ట్ర ప్రభుత్వం 11 కోట్ల రూపాయలు చెల్లించింది. అయితే, వశిష్ట వాహన్ సిఇవో సూష్టర్ తో తమకు ఏ విధమైన సంబంధం లేదని వోక్స్ వ్యాగన్ ప్రకటించింది. దీంతో వోక్స్ వ్యాగన్ వ్యవహారంలో కుంభకోణం వెలుగు చూసింది. అప్పుడు బొత్స సత్యనారాయణ భారీ పరిశ్రమల మంత్రిగా ఉన్నారు.

బొత్స సత్యనారాయణపై తీవ్రమైన ఆరోపణలు రావడంతో అప్పటి ముఖ్యమంత్రి వైయస్ రాజశేఖర రెడ్డి కేసును సిబిఐకి అప్పగించారు. దీంతో సిబిఐ కుంభకోణంపై దర్యాప్తు సాగించింది. విశాఖపట్నంలోని 500 ఎరకాల్లో వోక్స్ వ్యాగన్ కార్ల ఫ్యాక్టరీకి తెలుగుదేశం పార్టీ అధ్యక్షుడు నారా చంద్రబాబు నాయుడు ప్రభుత్వ హయాంలోనే ఒప్పందం కుదిరింది. ఎపిఐఐసికి, వోక్స్ వ్యాగన్ కు మధ్య ఒప్పందం కుదిరింది. ఆ తర్వాత అధికారంలోకి వచ్చిన వైయస్ రాజశేఖర రెడ్డి ప్రభుత్వం ఆ ఒప్పందాన్ని ఖరారు చేస్తూ వశిష్ట వాహన్ కు 11కోట్ల రూపాయలు చెల్లించింది.