హైదరాబాదులో టిడిపి నేత చలసాని పండు దారుణ హత్య

హైదరాబాద్: తెలుగుదేశం పార్టీ నాయకుడు చలసాని వెంకటేశ్వర రావు అలియాస్ పండు దారుణహత్యకు గురయ్యారు. హైదరాబాదులోని యూసుఫ్ గుడాలోని మధురానగర్ లో గల ఓ అపార్టుమెంటులో సోమవారం రాత్రి పది గంటలకు ఈ హత్య జరిగినట్లు తెలుస్తోంది. చలసాని పండు కృష్ణా జిల్లాకు చెందిన తెలుగుదేశం పార్టీ నాయకుడు. చలసాని పండు హత్య జరిగిన విషయం సోమవారం ఉదయం తెలిసింది. రాజకీయ కారణాల వల్ల ఈ హత్య జరిగిందా, అందుకు మరేమైనా కారణం ఉందా అనే కోణం నుంచి పోలీసులు దర్యాప్తు చేస్తున్నారు.

చలసాని పండు రెండు రోజుల క్రితం తన అనుచరుడు మహేందర్ రెడ్డితో కలిసి హైదరాబాదు వచ్చాడు. దీంతో మహేందర్ రెడ్డిపై అనుమానాలు వ్యక్తమవుతున్నాయి. చలసాని పండు పెనమలూరు శాసనసభా నియోజకవర్గం నుంచి రెండు సార్లు పోటీ చేసి ఓడిపోయారు. ఇటీవలి ఎన్నికల్లో మంత్రి పార్థసారథిపై ఆయన ఓటమి పాలయ్యారు. చలసాని పండు ఓ సెటిల్మెంట్ వ్యవహారంలో హైదరాబాదు వచ్చినట్లు కూడా అనుమానాలు వ్యక్తమవుతున్నాయి. ఈ సెటిల్మెంట్ వ్యవహారంలోనే ఆయన హత్యకు కారణమై ఉంటుందని కూడా భావిస్తున్నారు. పండుపై పలు కేసులున్నాయి. ఆయన కాంగ్రెసు నాయకుడు వంగవీటి రంగా హత్య కేసులో కూడా నిందితుడు.