వైయస్సార్ విగ్రహాల కబ్జా: నెల్లూరులో ముదురుతున్న వివాదం

నెల్లూరు: దివంగత నేత వైయస్ విగ్రహాల ప్రతిష్టాపనపై నెల్లూరు జిల్లాలో, ముఖ్యంగా నెల్లూరు పట్టణంలో తీవ్ర వివాదం చెలరేగుతోంది. స్వాతంత్ర్య సమరయోధుల విగ్రహాలకు కేటాయించిన స్థలాలను కబ్జా చేస్తూ వైయస్సార్ విగ్రహాలను స్థాపించేందుకు నెల్లూరులో ప్రయత్నాలు జరుగుతున్నాయి. జాతిపిత మహాత్మా గాంధీ విగ్రహం కన్నా ఎత్తుగా వైయస్సార్ విగ్రహాన్ని ఏర్పాటు చేస్తున్నారు. దీంతో నెల్లూరులో తీవ్ర వ్యతిరేకత ఎదురవుతోంది. ప్రకాశం జిల్లాలో తన ఓదార్పు యాత్రను ముగించుకుని కాంగ్రెసు పార్టీ కడప పార్లమెంటు సభ్యుడు వైయస్ జగన్ నెల్లూరు జిల్లాలో ప్రవేశిస్తారు. ఈలోగా వైయస్ విగ్రహాల స్థాపన జరగాల్సింది. ఈ ప్రయత్నంలో వైయస్ జగన్ వర్గంపై విపరీతమైన వ్యతిరేకత ఎదురవుతోంది. దీనివల్ల నెల్లూరులో వర్గపోరు ముదిరే ప్రమాదం కూడా ఉంది.

నెల్లూరు శివారులోని బుచ్చిరెడ్డిపాలెం స్వాతంత్ర్య సమరయోధుడు, ఆంధ్ర రాష్ట్ర ముఖ్యమంత్రి బెజవాడ గోపాల రెడ్డి స్వస్థలం. ఆయన విగ్రహ ప్రతిష్టాపనకు కొంత స్థలం కేటాయించారు. అయితే, వైయస్సార్ విగ్రహ ప్రతిష్టాపన కోసం ఆ భూమిని జగన్ వర్గీయులు కబ్జా చేశారు. దీంతో ఒక వర్గం తీవ్ర మనస్తాపానికి గురవుతోంది. నెల్లూరు జిల్లాలో మహామహులు పట్టి పెరిగారు. వారిని కించపరిచేలా వైయస్సార్ విగ్రహాలను ప్రతిష్టించాలనే ప్రయత్నాలపై తీవ్ర విమర్శలు వ్యక్తమవుతున్నాయి. అలాగే, నెల్లూరు గాంధీ సెంటర్ లో జాతిపిత మహాత్మా గాంధీ విగ్రహం కన్నా పెద్దగా వైయస్సార్ విగ్రహం ఏర్పాటు చేస్తున్నారు. దీనిపై కూడా ఆగ్రహం వ్యక్తమవుతోంది.