మేకపాటిపై సిద్దిపేట ఎంపీ సర్వే సత్యనారాయణ ధ్వజం

హైదరాబాద్: వైఎస్ బొమ్మ పెట్టుకొని గెలిచానని చెప్పటం ద్వారా నెల్లూరు పార్లమెంట్ సభ్యుడు మేకపాటి రాజమోహనరెడ్డి సోనియాగాంధీని ఆవమానపరిచాడని సిద్దిపేట పార్లమెంటు సభ్యుడు సర్వే సత్యనారాయణ తీవ్ర స్థాయిలో ధ్వజమెత్తారు. సోనియాగాంధీని కించపరిచేలా మాట్లాడిన మేకపాటిపై అధిష్టానం వెంటనే చర్యలు తీసుకోవాలన్నారు. సీమాంధ్రులు తెలంగాణ నాయకులపై ఇష్టం వచ్చినట్టు మాట్లాడుతున్నారని వారిని పిసిసి అధ్యక్షుడు డి.శ్రీనివాస్ కట్టడి చేయాల్సిన అవసరం ఉందన్నారు. పార్టీ ఎంపిలతో డిఎస్ సమావేశానంతరం సర్వే సత్యనారాయణ మీడియాతో మాట్లాడారు.

వారు ఇలాగే మాట్లాడితే ఊరుకునేది లేదని హెచ్చరించారు. సక్రమంగా పనిచేస్తున్న ముఖ్యమంత్రిని వ్యతిరేకిస్తూ అధిష్టానానికి వ్యతిరేకంగా వారు పనిచేస్తున్నారని అన్నారు. తెలంగాణ విషయంలో కాంగ్రెసు పార్టీలోని ఎవరు కూడా సోనియాగాంధీ నిర్ణయానికి వ్యతిరేకంగా ఉండరాదన్నారు. ఉద్యమం సందర్భంగా విద్యార్థులపై పెట్టిన కేసులను ఎత్తేయాలని పార్లమెంటు సభ్యుడు వివేక్ సమావేశంలో పాల్గొన్న ముఖ్యమంత్రి కె. రోశయ్యను కోరారు. ఈ విషయం పరిశీలిస్తానని ఆయన హామీ ఇచ్చారు.