నాపైనే చర్యలా అంటూ డిఎస్ పై కొండా సురేఖ ధిక్కార స్వరం

ఒంగోలు: ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పై కడప పార్లమెంటు సభ్యుడు వైయస్ జగన్ వర్గానికి చెందిన శానససభ్యురాలు కొండా సురేఖ ధిక్కార స్వరం వినిపించారు. తనపై పార్టీ అధిష్టానానికి ఫిర్యాదు చేస్తున్నట్లు డిఎస్ చెప్పిన మాటలపై ఆమె శుక్రవారం తీవ్రంగా మండిపడ్డారు. సీనియర్ నాయకులు పాల్వాయి గోవర్దన్ రెడ్డి, శంకర రావు, వి హనుమంతరావులపై ఫిర్యాదు చేయని డిఎస్ తనపై ఎలా అధిష్టానానికి ఫిర్యాదు చేస్తారని ఆమె ప్రశ్నించారు. సీనియర్ నాయకులపై ఫిర్యాదు చేస్తూ తాను ఓ లేఖను పార్టీ అధిష్టానానికి ఫ్యాక్స్ చేసినట్లు ఆమె తెలిపారు. తనను సస్పెండ్ చేస్తారని తాను అనుకోవడం లేదని, ఒక వేళ సస్పెండ్ చేసినా తాను వివరణ ఇస్తానని, తన వివరణకు అధిష్టానం సంతృప్తి చెందుతుందనే నమ్మకం తనకు ఉందని ఆమె అన్నారు.

వైయస్ జగన్ ఓదార్పు యాత్రలో పాల్గొనకూడదని అధిష్టానం ఎక్కడా చెప్పలేదని, ఓదార్పు యాత్రలో పాల్గొంటే చర్యలు తీసుకుంటామని కూడా చెప్పలేదని ఆమె అన్నారు. తన మాటలను వక్రీకరించారని ఆమె అన్నారు. అన్ని విషయాలు సోనియాకు చెప్తానని, సోనియా అపాయింట్ మెంటు దొరికిన వెంటనే వెళ్లి అన్ని విషయాలూ చెప్తానని ఆమె అన్నారు. రాష్ట్రంలో అత్యధిక పార్లమెంటు సీట్లు గెలిచి రాహుల్ గాంధీ ప్రధాని కావాలంటే నాయకత్వ బాధ్యతలు వైయస్ జగన్ కు అప్పగించాల్సిన అవసరం ఉందని ఆమె అన్నారు. వైయస్ జగన్ ఓదార్పు యాత్ర ఆగుతుందని తాను అనుకోవడం లేదని ఆమె అన్నారు. మరణించిన తర్వాత వైయస్ రాజశేఖర రెడ్డిపై బురద చల్లుతున్నారని ఆమె విమర్శించారు.