తెలంగాణ రాష్ట్ర ఏర్పాటుకు సోనియా గాంధీ అంగీకరించారా?

హైదరాబాద్: తెలంగాణ రాష్ట్ర ఏర్పాటుకు కాంగ్రెసు అధ్యక్షురాలు సోనియా గాంధీ గ్రీన్ సిగ్నల్ ఇచ్చారనే అనుమానాలు వ్యక్తమవుతున్నాయి. కాంగ్రెసు తెలంగాణ నాయకుల తీరు చూస్తుంటే ఆ అనుమానాలు కలుగుతున్నాయి. చాలా కాలం అధిష్టానం నిర్ణయానికి కట్టుబడి ఉంటామంటూ చెబుతూ వచ్చిన తెలంగాణ నాయకులు ఇప్పుడు తెలంగాణ వచ్చేసినట్లేనని చెబుతున్నారు. తెలంగాణ త్యాగధనుల సంస్మరణ సభలను నిర్వహిస్తున్నారు. కరీంనగర్ లో, ఆదిలాబాద్ జిల్లా మంచిర్యాలలో వారు ఈ సభలను నిర్వహించారు. ఈ సభల్లో పార్టీ నాయకులే కాకుండా తెలంగాణ ప్రాంతానికి చెందిన నాయకులు కూడా పాల్గొంటున్నారు. ఈ రకంగా చూస్తే దీనికి పార్టీ అధిష్టానం అనుమతి ఉందనే అభిప్రాయం కలుగుతోంది. శ్రీకృష్ణ కమిటీ నివేదిక ఇచ్చి, కేంద్ర ప్రభుత్వం అధికారిక నిర్ణయాన్ని మరోసారి వెల్లడించేలోగా తామే తెలంగాణ సాధించామనే అభిప్రాయాన్ని ప్రజల్లోకి తీసుకు వెళ్లడానికి వారు ప్రయత్నాలు చేస్తున్నారని భావిస్తున్నారు.

గతంలో ఎన్నడూ లేని విధంగా సీనియర్ నాయకుడు కె. కేశవ రావు దూకుడుగా వ్యవహరిస్తున్నారు. సోనియా తెలంగాణకు అంగీకరించారని ఆయన చెప్పారు. దానికి ఎటువైపు నుంచి కూడా ఖండన రాలేదు. కానీ, అనవసరంగా సోనియా పేరును వివాదంలోకి లాగవద్దని సీమాంధ్ర నాయకులు కేశవరావునుద్దేశించి అన్నారు. తెలంగాణ నాయకులు పెట్టుకునే సభలకు మాత్రం వారు వ్యతిరేకత చూపడం లేదు. పార్టీ కార్యక్రమంగానే అమరవీరుల సంస్మరణ సభలను నిర్వహిస్తున్నామని తెలంగాణ నాయకులు చెబుతున్నారు. కేంద్ర మంత్రి ప్రణబ్ ముఖర్జీకి, పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీకి చెప్పే తాము ఈ సభలను నిర్వహిస్తున్నామని కూడా చెప్పారు. తెలంగాణ కార్యక్రమాల నిర్వహణకు అధిష్టానం పేరు వాడుకోవద్దనే మాట ఎవరూ అనడం లేదు. అంటే, కాంగ్రెసు నాయకులకు సోనియా గాంధీ నుంచి స్పష్టమేన సంకేతాలు అందాయా అని కూడా ఆలోచిస్తున్నారు.