రోశయ్య మంత్రివర్గ విస్తరణకు కర్ణాటక సంక్షోభం దెబ్బ?

న్యూఢిల్లీ: ముఖ్యమంత్రి కె. రోశయ్య మంత్రివర్గ విస్తరణకు కర్ణాటక రాజకీయ పరిస్థితి దెబ్బ వేసినట్లు కనిపిస్తోంది. ముఖ్యమంత్రి రోశయ్య సోమవారం సాయంత్రం కాంగ్రెసు అధ్యక్షురాలు సోనియా గాంధీతో సమావేశమయ్యారు. సమావేశంలో సోనియా రాజకీయ సలహాదారు అహ్మద్ పటేల్ కూడా పాల్గొన్నారు. సోనియాతో వారి భేటీ కొద్దిసేపు మాత్రమే సాగింది. అంతకు ముందు రోశయ్య కేంద్ర మంత్రి చిదంబరంతోనూ, అహ్మద్ పటేల్ తోనూ సమావేశమయ్యారు. తాను మర్యాదపూర్వకంగా మాత్రమే కలిశానని రోశయ్య మీడియా ప్రతినిధులతో ఆ సమయంలో చెప్పారు. దీన్నిబట్టి కూడా రోశయ్య మంత్రివర్గ విస్తరణ ఢిల్లీ పర్యటనలో ప్రాధాన్యం సంతరించుకోలేదని తెలుస్తోంది. కర్ణాటక పరిస్థితిపై సోనియా గాంధీ దృష్టి సారించాల్సిన స్థితిలో పడ్డారు. దీంతో ఆంధ్రప్రదేశ్ లో మంత్రివర్గ విస్తరణను కొద్ది కాలం వాయిదా వేయాలనే ఉద్దేశంతో ఆమె ఉన్నట్లు చెబుతున్నారు. అయితే, సోనియాను కలిసిన తర్వాత రోశయ్య తీపి కబురు చెప్తారని పార్లమెంటు సభ్యుడు రాయపాటి సాంబశివ రావు అన్నారు.

కాగా, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తాజా హెచ్చరికలపై, గద్దర్ తెలంగాణ ప్రజా ఫ్రంట్ పై సోనియా అడిగి తెలుసుకున్నట్లు తెలుస్తోంది. నామినేటెడ్ పోస్టుల భర్తీపై కూడా సోనియాతో మాట్లాడినట్లు సమాచారం. తెలంగాణపై త్వరలో శ్రీకృష్ణ కమిటీ నివేదిక ఇవ్వనున్న తరుణంలో మంత్రి వర్గ పునర్వ్యస్థీకరణ అవసరమా అనే సందేహంలో కూడా సోనియా ఉన్నట్లు చెబుతున్నారు.