చంద్రబాబుకు షాక్: వైయస్ జగన్ వెంట నల్లపరెడ్డి ప్రసన్నకుమార్

నెల్లూరు: నెల్లూరు జిల్లాకు చెందిన తెలుగు దేశం పార్టీ రెబెల్ ఎమ్మెల్యే నల్లపురెడ్డి ప్రసన్నకుమార్ రెడ్డి కడప పార్లమెంటు సభ్యుడు వైఎస్ జగన్మోహన్ రెడ్డికి వత్తాసు పలికారు. ఆ రకంగా ఆయన తెలుగుదేశం పార్టీ అధ్యక్షుడు నారా చంద్రబాబు నాయుడుకు షాక్ ఇచ్చారు. తన తండ్రి వైఎస్ రాజశేఖర్ రెడ్డి మరణాన్ని తట్టుకోలేక చనిపోయిన వారి కుటుంబాలను పరామర్శించడం జగన్ మంచితనానికి నిదర్శనమన్నారు. వారిని ఓదార్చి, ధైర్యం చెప్పి, ఏదైనా సమస్య వస్తే ఆపన్న హస్తం అందించటానికి నేనున్నానని చెప్పడానికే ఓదార్పు చేపట్టాడన్నారు.

అలాంటి మంచి పని చేస్తున్న జగన్ కు పార్టీలకతీతంగా అందరూ బాసటగా నిలవాలన్నారు. తనవంతుగా నెల్లూరు జిల్లాలో వైఎస్ జగన్మోహన్ రెడ్డి ఓదార్పు యాత్ర చేపట్టినప్పుడు తాను తప్పకుండా ఆ ఓదార్పులో పాల్గొంటానని ఆయన చెప్పారు. జగన్ చేపడుతున్న యాత్ర ఆయన వ్యక్తిగతమని, పార్టీకి సంబంధించినది కాదని ఆందులోనూ ఓ మంచి పని కాబట్టి తాను పాల్గొనటంలో తప్పులేదని సమర్థించుకున్నారు.