వైయస్ జగన్ భారతి సిమెంట్స్ కు అధికారుల నోటీసు

కడప: కాంగ్రెసు కడప పార్లమెంటు సభ్యుడు వైఎస్‌ జగన్‌కు చెందిన భారతి సిమెంట్స్‌కు గనులు, భూగర్భ వనరుల శాఖ అధికారులు నోటీసులు జారీ చేశారు. సిమెంట్‌ ప్లాంట్ల నిర్మాణ పనులకు వినియోగించిన ఇసుక, కంకరకు సంబంధించి సీనరేజి బిల్లులు చూపాల్సిందిగా వారం కిందట ఎర్రగుంట్ల డివిజను గనులు, భూగర్భ వనరుల శాఖ సహాయ సంచాలకులు యాజమాన్యానికి నోటీసులు పంపారు. వాస్తవానికి మొదటి ప్లాంటును 2008లో మొదలుపెట్టి ఏడాదిలో పూర్తి చేశారు. 2009 సెప్టెంబరు నుంచి సిమెంటు ఉత్పత్తి ప్రారంభించారు. రెండో ప్లాంటు నిర్మాణం కూడా దాదాపు పూర్తి కావొచ్చింది. అయితే ఇప్పటి వరకు భారతి యాజమాన్యం సీనరేజి బిల్లులను గనులశాఖకు చూపలేదు. అధికారులకు కూడా ప్లాంటు వద్దకు వెళ్లి తనిఖీలు నిర్వహించలేదు.

ఈ నేపథ్యంలో రెండు ప్లాంట్లకు వినియోగించిన ఇసుక, కంకర సీనరేజి బిల్లులు తమకు చూపాలని నోటీసులు ఇవ్వడం ప్రాధాన్యం సంతరించుకుంది. 2010 ఏప్రిల్‌ 24న ఎర్రగుంట్ల డివిజను అధికారులు ప్లాంటు ప్రాంగణంలోకి తనిఖీలకు వెళ్లారు. తనిఖీల్లో 17,349 క్యూబిక్‌ మీటర్ల ఇసుక, 5035 క్యూబిక్‌ మీటర్ల కంకర నిల్వ చేసినట్లు తేలింది. వీటికి సంబంధించి సీనరేజి బిల్లులుచూపాలని అధికారులు 2010 మే 26న భారతి సిమెంట్స్‌కు నోటీసులు పంపారు. దీనిపై ఇప్పటికీ యాజమాన్యం స్పందించలేదు.