ఆంధ్ర రాజధాని కోసం కొట్లాట: విజయవాడనా, ఓంగోలా?

హైదరాబాద్: ఆంధ్ర, తెలంగాణ కొట్లాట స్థానంలో ఇప్పుడు ఆంధ్ర రాజధాని కోసం కొట్లాట ప్రారంభమైంది. హైకోర్టు బెంచ్ ల స్థాపన కోసం ప్రారంభమైన సమరం క్రమంగా ఆంధ్ర రాష్ట్ర రాజధాని కోసం పోరుగా మారింది. తెలంగాణ రాష్ట్రం ఏర్పాటైతే ఆంధ్ర రాష్ట్ర రాజధాని ఏది కావాలనేది ఇప్పుడు వివాదంగా మారింది. ఆంధ్ర ప్రాంతంలోని నగరాలు, పట్టణాలు తమలో తాము ఘర్షించుకుంటున్నాయి. ఓ వైపు విజయవాడ, గుంటూరుల మధ్య వివాదం నెలకొనగా, మరో వైపు ఒంగోలు రంగంలోకి వస్తోంది. హైకోర్టు బెంచ్ ను గుంటూరులో ఏర్పాటు చేయాలని ఆ నగర న్యాయవాదులు డిమాండ్ చేస్తున్నారు. విజయవాడలోనే ఏర్పాటు చేయాలని అంతకు ముందు నుంచి విజయవాడ న్యాయవాదులు డిమాండ్ చేస్తూ ఆందోళనకు దిగారు.

హైకోర్టు బెంచ్ ను తమ పట్టణంలో ఏర్పాటు చేయాలని ఒంగోలు న్యాయవాదులు సోమవారం నుంచి ఆందోళన మొదలు పెట్టారు. గుంటూరులో బదులు హైకోర్టు బెంచ్ ను ఒంగోలులో ఏర్పాటు చేయాలని వారు డిమాండ్ చేస్తున్నారు. ఒంగోలు న్యాయవాదులు కొంత మంది ఇప్పటికే ఆమరణ నిరాహార దీక్షను ప్రారంభించారు. ఇది రాజధాని గొడవకు దారి తీస్తోంది. రాష్ట్రం విడిపోతే గుంటూరు, విజయవాడ ఉమ్మడి రాజధానిగా ఉండాలని ఆ రెండు నగరాల ప్రజలు, రాజకీయ నాయకులు కోరుతున్నారు. ఒంగోలును రాజధానిగా చేయాలని రాయలసీమ నాయకులు డిమాండ్ చేస్తున్నారు. విజయవాడ - గుంటూరును తాము రాజధానిగా అంగీకరించబోమని వారంటున్నారు. ఒంగోలు రాజధానిగా ఉండాలని డిమాండ్ చేస్తున్న నాయకుల్లో రాయలసీమ హక్కుల వేదిక కన్వీనర్, కాంగ్రెసు శాసనసభ్యుడు టిజి వెంకటేష్ ముఖ్యులు.