బెజవాడ పర్యటన రద్దుతో చిరంజీవికి వంగవీటి రాధా షాక్

విజయవాడ: ప్రజారాజ్యం పార్టీ అధ్యక్షుడు చిరంజీవికి శాసనసభ్యుడు వంగవీటి రాధ మెగా షాక్ ఇవ్వబోతున్నారు. తనకు సంబంధించిన దుర్గమ్మ ప్రభల కార్యక్రమానికి చిరంజీవి రాకపోవడంపై ఆయన తీవ్రంగా ఆగ్రహం వ్యక్తం చేస్తున్నారు. పార్టీ అంతర్గత కలహాలతో శనివారంనాటి చిరంజీవి విజయవాడ పర్యటన రద్దయింది. దీంతో రాధ తీవ్ర అసంతృప్తికి గురయ్యారు. గతంలో దివంగత ముఖ్యమంత్రి వైయస్ రాజశేఖర రెడ్డి తనకు మంత్రిపదవి ఇస్తానని చెప్పినా చిరంజీవిని నమ్ముకుని తాను ప్రజారాజ్యం పార్టీలోకి వచ్చానని, అందుకు తగిన శాస్తి అనుభవించానని వంగవీటి రాధ అంటున్నారు. అందరినీ కలుపుకుని వెళ్లకపోతే ఎలా ఆయన ప్రశ్నిస్తున్నారు. బహిరంగంగానే వంగవీటి రాధ తన అసంతృప్తిని వ్యక్తం చేస్తున్నారు.

రెండు రోజుల్లోగా తన భవిష్యత్తు కార్యక్రమాన్ని రూపొందించుకుంటానని ఆయన చెప్పారు. దీన్నిబట్టి ప్రజారాజ్యం పార్టీకి దూరం కావడానికి కూడా వంగవీటి రాధాకృష్ణ సిద్ధమవుతున్నట్లు తెలుస్తోంది. ఆయన తన అనుచరులతో సమావేశమయ్యారు. కాగా, హైదరాబాదులోని రాష్ట్ర పార్టీ కార్యాలయం నుంచి వంగవీటి రాధాకు సమాచారం అందింది. తొందరపడి నిర్ణయం తీసుకోవద్దని పార్టీ రాష్ట్ర కార్యాలయం ఆయనను కోరింది. దుర్గమ్మ ప్రభల కార్యక్రమానికి రావాలని రాధా చేసిన విజ్ఞప్తికి చిరంజీవి అంగీకరించారు. అదే సమయంలో మరో శాసనసభ్యుడు శ్రీనివాస రావు చిరంజీవి పాల్గొనే ఇతర కార్యక్రమాలను కూడా ఖరారు చేశారు. ఆ కార్యక్రమాల్లో పాల్గొంటే దుర్గమ్మ ప్రభల కార్యక్రమానికి చిరంజీవి రావడం ఆలస్యమవుతుందని రాధా వాదించారు. దీంతో దుర్గమ్మ ప్రభల కార్యక్రమానికి మాత్రమే రావడానికి చిరంజీవి అంగీకరించారు. ఆయన శనివారం మధ్యాహ్నం విజయవాడ చేరుకోవాల్సింది.

అయితే అకస్మాత్తుగా చిరంజీవి విజయవాడ పర్యటన రద్దయినట్లు రాధాకు సమాచారం అందింది. కొంత మంది సీనియర్లు మాట్లాడి చిరంజీవి విజయవాడ పర్యటనను రద్దు చేయించినట్లు తెలుస్తోంది. దీంతో వంగవీటి రాధాకృష్ణ చిరంజీవిపై భగ్గుమంటున్నారు. నిరుడు దుర్గమ్మ ప్రభల కార్యక్రమంలో చిరంజీవి కుమారుడు, సినీ నటుడు రామ్ చరణ్ తేజా పాల్గొన్నారు.