చంద్రబాబు తెలంగాణ వైఖరిని తప్పు పట్టిన కాంగ్రెసు ఎంపీలు

హైదరాబాద్: తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడు వైఖరిని కాంగ్రెసు తెలంగాణ పార్లమెంటు సభ్యులు తప్పు పట్టారు. మహబూబ్ నగర్ లో తలపెట్టిన తెలంగాణ త్యాగమూర్తుల సంస్మరణ సభలో పాల్గొనేందుకు బయలుదేరడానికి ముందు వారు శనివారం ఉదయం మీడియా ప్రతినిధులతో మాట్లాడారు. చంద్రబాబు తెలంగాణకు వ్యతిరేకంగా వ్యవహరించడం వల్లనే సమస్య జఠిలమైందని కాంగ్రెసు పార్లమెంటు సభ్యుడు జి. వివేక్ అన్నారు. శ్రీకృష్ణ కమిటీ డిసెంబర్ 31వ తేదీలోగా నివేదిక సమర్పించనున్న నేపథ్యంలో పార్లమెంటులో తెలంగాణ రాష్ట్ర ఏర్పాటుకు బిల్లు పెట్టాలని తెలుగుదేశం నాయకులు అనడంలో అర్థం లేదని ఆయన అన్నారు. తెలంగాణపై కాంగ్రెసు స్పష్టమైన వైఖరితో ఉందని ఆయన స్పష్టం చేశారు.

తెలంగాణపై ఢిల్లీ యాత్ర తలపెట్టిన సందర్భంగా తెలుగుదేశం పార్టీ తెలంగాణ నాయకులు వేసిన కరపత్రంపై చంద్రబాబు ఫొటో లేకపోవడాన్ని మందా జగన్నాథం తప్పు పట్టారు. దాన్ని బట్టే చంద్రబాబు తెలంగాణకు వ్యతిరేకంగా ఉన్నట్లు అర్థమవుతోందని ఆయన అన్నారు. తాము కాంగ్రెసు పార్టీగానే తెలంగాణ త్యాగమూర్తుల సంస్మరణ నిర్వహిస్తున్నామని ఆయన చెప్పారు. తెలంగాణపై తెలుగుదేశం తెలంగాణ నాయకులు ఢిల్లీ యాత్ర చేపట్టడాన్ని కూడా ఆయన తప్పు పట్టారు. చంద్రబాబు తెలంగాణకు అనుకూలంగా లేరని, ఈ స్థితిలో తెలంగాణ నేతల మాటలకు విలువ ఉండదని ఆయన అన్నారు.