అవతరణ దినోత్సవాల్లో పాల్గొంటాం, అడ్డుకుంటే సహించం: కోమటిరెడ్డి

హైదరాబాద్: నవంబర్ 1వ తేదీన రాష్ట్ర అవతరణ దినోత్సవాల్లో పాల్గొని తీరుతామని తెలంగాణ ప్రాంతానికి చెందిన రాష్ట్ర ఐటి మంత్రి కోమటిరెడ్డి వెంకటరెడ్డి అన్నారు. తెలంగాణకు చెందిన 12 మంది మంత్రులం అవతరణ దినోత్సవాల్లో పాల్గొంటామని, ఎవరైనా తమను అడ్డుకోవడానికి ప్రయత్నిస్తే సహించబోమని ఆయన బుధవారం మీడియా ప్రతినిధులతో అన్నారు. రాష్ట్ర అవతరణ దినోత్సవాల్లో పాల్గొనడం రాష్ట్ర మంత్రులుగా తమ బాధ్యత అని ఆయన అన్నారు. రాష్ట్ర విభజన జరిగే వరకు అందులో పాల్గొనాల్సిందేనని ఆయన అన్నారు. శాంతియుతంగా విడిపోదామని, ఇటువంటి చర్యలతో విద్వేషాలు పెంచవద్దని ఆయన సూచించారు. సామరస్యపూర్వకంగా విడిపోదామని ముఖ్యమంత్రి కె. రోశయ్య చేసిన ప్రకటనను ఆయన గుర్తు చేశారు. డిసెంబర్ 31వ తేదీన శ్రీకృష్ణ కమిటీ నివేదిక సమర్పిస్తుందని, ఆ తర్వాత తమ కాంగ్రెసు పార్టీ అధ్యక్షురాలు సోనియా గాంధీపై, పార్టీ అధిష్టానంపై ఒత్తిడి తెచ్చి తెలంగాణ రాష్ట్రం సాధించడం కూడా తమ బాధ్యత అని, ఆ బాధ్యతను నెరవేరుస్తామని, ఆ స్థితిలో రాష్ట్ర అవతరణ దినోత్సవాలను అడ్డుకోవడం మంచిది కాదని ఆయన అన్నారు.

రాష్ట్ర అవతరణ దినోత్సవాల్లో పాల్గొంటే సహించబోమని చేసిన ప్రకటనలపై ఆయన తీవ్రంగా ప్రతిస్పందించారు. అలాంటి వారు ఐదారుగురు మాత్రమే ఉన్నారని, తమ పార్టీ కార్యకర్తలు వేలాది మంది ఉన్నారని ఆయన అన్నారు. ఘర్షణలు వద్దని ఆయన సూచించారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై ఆయన తీవ్రంగా మండిపడ్డారు. సమైక్యవాది అయిన తమ పార్టీ పార్లమెంటు సభ్యుడు లగడపాటి రాజగోపాల్ తో తమ తెలంగాణ ప్రాంతానికి చెందిన తమకు ఏడాది కాలంగా మాటలు లేవని ఆయన చెప్పారు. అటువంటి రాజగోపాల్ తో కెసిఆర్ నువ్వు అక్కడ హీరో, నేను ఇక్కడ హీరో అంటున్నారని ఆయన వ్యాఖ్యానించారు. వారిద్దరు అలా మాట్లాడుకుంటే సరిపోదని ఆయన అన్నారు. రాష్ట్ర అవతరణ దినోత్సవాల్లో పాల్గొంటామని హైదరాబాదుకు చెందిన రాష్ట్ర మంత్రి దానం నాగేందర్ కూడా ప్రకటించారు. కేంద్రంలో మంత్రిగా, పార్లమెంటు సభ్యుడిగా ఉన్నప్పుడు కెసిఆర్ రాష్ట్ర అవతరణ దినోత్సవాల్లో పాల్గొనలేదా అని ఆయన అడిగారు.