రాష్ట్ర అవతరణ దినోత్సవాలకు మేం దూరమే: కాంగ్రెసు ఎంపి వివేక్

హైదరాబాద్: రాష్ట్ర అవతరణ దినోత్సవాలకు తాము దూరంగా ఉంటామని కాంగ్రెసు తెలంగాణ ప్రాంత పార్లమెంటు సభ్యుడు జి. వివేక్ ప్రకటించారు. ఉత్సవాలకు దూరంగా ఉండాలని కాంగ్రెసు తెలంగాణ ప్రాంత శాసనసభ్యులు, పార్లమెంటు సభ్యులు, ఎమ్మెల్సీలు నిర్ణయం తీసుకున్నట్లు ఆయన బుధవారం మీడియా ప్రతినిధులతో చెప్పారు. రాష్ట్ర అవతరణ దినోత్సవాల్లో పాల్గొనాలా, వద్దా అనే నిర్ణయం తీసుకునే స్వేచ్ఛ తెలంగాణ ప్రాంత మంత్రులకు ఉందని ఆయన చెప్పారు. తెలంగాణ నేతలు ప్రచారం కోసం పరితపించడం లేదని ఆయన స్పష్టం చేశారు.

తాము ఈ నెల 29వ తేదీన శ్రీకృష్ణ కమిటీని మరోసారి కలుస్తామని, సాగునీటి ప్రాజెక్టులపై వివరాలు అందిస్తామని ఆయన చెప్పారు. తెలంగాణ రాష్ట్రాన్ని సాధించడానికి తాము చిత్తశుద్ధితో పని చేస్తున్నట్లు ఆయన తెలిపారు. న్యాయవాదుల స్టాండింగ్ కౌన్సిళ్లలో తెలంగాణకు తగిన వాటా ఇచ్చినందుకు ఆయన ప్రభుత్వానికి కృతజ్ఞతలు చెప్పారు. ఇటువంటి పోస్టుల్లో భవిష్యత్తులో కూడా ఇదే విధమైన న్యాయం చేయాలని ఆయన ప్రభుత్వాన్ని కోరారు.