నాలుగేళ్లలో మెట్రో రైలు పట్టాలెక్కుతుంది: మంత్రి ఆనం రామనారాయణ

హైదరాబాద్: మెట్రో రైలు భూసేకరణ కోసం 500 కోట్లు రూపాయలు అవసరమవుతాయని మంత్రి ఆనం రామనారాయణ గురువారం మీడియా సమావేశంలో తెలిపారు. ముఖ్యమంత్రి రోశయ్యతో మెట్రో రైలుపై సమీక్ష అనంతరం ఆయన మాట్లాడారు. భూసేకరణలో కొన్ని ఇబ్బందులు ఉన్నాయని అయితే ప్రభుత్వం వాటిని అధిగమిస్తుందని చెప్పారు. జూబ్లీహిల్స్ నుండి ఫలక్ నుమా వరకు 12 ప్రార్థనా స్థలాలు ఉన్నట్లు మంత్రి చెప్పారు.

అయితే అన్ని సమస్యలను అధిగమించి 2011 మార్చిలో మెట్రో పనులు ప్రారంభిస్తామన్నారు. నాలుగేళ్లలో పనులు పూర్తి చేస్తామన్నారు. పనుల కోసం ఇప్పటికే 119 కోట్లు విడుదల చేసినట్లు చెప్పారు. 261 ఎకరాల భూమి అవసరం ఉందని చెప్పారు. ఈ డిసెంబర్ 14న ఎల్ అండ్ టి కంపెనీ, ప్రభుత్వానికి మధ్య ఓ స్వతంత్ర సంస్థను ఏర్పాటు చేయనున్నట్లు చెప్పారు.