తెలంగాణ ఇచ్చేది, తెచ్చేది తాను కాదంటున్న వైయస్ జగన్

హైదరాబాద్: తెలంగాణపై కర్ర విరగకుండా, పాము చావకుండా వ్యవహరించాలని కాంగ్రెసు కడప పార్లమెంటు సభ్యుడు వైయస్ జగన్ నిర్ణయించుకున్నారు. ఆయన ముఖ్య అనుచరుడు, కాంగ్రెసు బహిష్కృత నేత అంబటి రాంబాబు మాటలను బట్టి ఆ విషయం అర్థమవుతోంది. పార్లమెంటులో ప్లకార్డు ప్రదర్శిస్తూ ఆందోళనకు దిగడం వల్ల వైయస్ జగన్ పై తెలంగాణ వ్యతిరేకిగా ముద్ర పడిన మాట వాస్తవమేనని ఆయన ఓ ప్రైవేట్ తెలుగు టీవీ చానెల్ కార్యక్రమంలో అన్నారు. అయితే, తెలంగాణ ఇచ్చే స్థితిలో గానీ తెచ్చే స్థితిలో గానీ జగన్ లేరని ఆయన అన్నారు. కీలకమైన పదవిలో వైయస్ జగన్ లేనందున తెలంగాణపై వైఖరిని చెప్పాల్సిన అవసరం లేదని ఆయన అన్నారు. తెలంగాణపై కాంగ్రెసు పార్టీ అధిష్టానం నిర్ణయం తీసుకోవాల్సిందేనని ఆయన అన్నారు.

కాంగ్రెసుకు చెందిన 33 మంది పార్లమెంటు సభ్యుల్లో జగన్ ఒక్కరని, అందువల్ల జగన్ తెలంగాణపై వైఖరిని చెప్పాల్సిన అవసరం లేదని ఆయన అన్నారు. తెలంగాణలో వైయస్ జగన్ కు అనుచరులు, దివంగత నేత వైయస్ రాజశేఖర రెడ్డికి అభిమానులు ఉన్నారని, వైయస్ జగన్ తెలంగాణలో ఓదార్పు యాత్ర చేస్తారని ఆయన అన్నారు. వరంగల్ జిల్లా మహబూబాబాద్ ఓదార్పు యాత్రను కుట్రపూరితంగా అడ్డుకున్నారని, సంఘటితంగా పథకం ప్రకారం తెలంగాణ రాష్ట్ర సమితి (తెరాస) అడ్డుకుందని ఆయన అన్నారు. తెలంగాణకు చెందిన తమ పార్టీ నాయకులు కూడా వ్యతిరేకించిందని, అంతేకాకుండా తమ పార్టీ అధిష్టానం కూడా వ్యతిరేకంగా ప్రవర్తించిందని ఆయన అన్నారు.