జెసి దివాకర్ రెడ్డికి ముఖ్యమంత్రి రోశయ్య క్లాస్ తీసుకున్నారా?

హైదరాబాద్: కాంగ్రెసు సీనియర్ శాసనసభ్యుడు జెసి దివాకర్ రెడ్డికి ముఖ్యమంత్రి కె. రోశయ్య క్లాస్ తీసుకున్నారా అనే అనుమానం కలుగుతోంది. లేదంటే పార్టీ హైకమాండ్ నోరు మూసుకోవాలని ఆదేశించిందా అనే ఆలోచన కలుగుతోంది. ప్రత్యర్థుల మీద ఎల్లవేళలా వ్యంగ్యాస్త్రాలు విసిరే జెసి దివాకర్ రెడ్డి గురువారంనాడు నోరు విప్పడానికి నిరాకరించారు. ఆయన వ్యాఖ్యలు ఇటీవల రోశయ్య సామర్థ్యాన్ని కూడా ప్రశ్నించే విధంగా ఉండడంతో వివాదం చెలరేగినట్లు భావిస్తున్నారు. దీంతో రోశయ్య ఆయనకు క్లాస్ తీసుకున్నట్లు ప్రచారం జరుగుతోంది.

ఎమ్మార్ ప్రాపర్టీస్ వివాదంపై, కడప పార్లమెంటు సభ్యుడు వైయస్ జగన్ పై మీడియా ప్రతినిధులు ప్రశ్నించినప్పుడు నమస్కారం, థ్యాంక్స్ అని తప్పించుకోవడానికి ప్రయత్నించారు. మీరు మౌనం పాటిస్తున్నారా, మాట్లాడలేరా, మాట్లాడడానికి భయపడుతున్నారా అంటూ మీడియా ప్రతినిధులు రెచ్చగొట్టడానికి ప్రయత్నించారు. అలాంటి ప్రశ్నలు వచ్చినా ఆయన పదే పదే థ్యాంక్స్ అంటూ అన్నారే గానీ ఒక్క మాటా మాట్లాడలేదు. మంత్రివర్గ పునర్వ్యస్థీకరణపై చేసిన వ్యాఖ్యలు వివాదాస్పదం కావడంతో జెసికి ముఖ్యమంత్రి క్లాస్ తీసుకున్నారని, అందువల్లనే ఆయన మాట్లాడడానికి ఇష్టపడలేదని అనుమానిస్తున్నారు.