రాజకీయ మనుగడ కోసమే వివాదం: సీమాంధ్ర నేతలపై పాల్వాయి

న్యూఢిల్లీ: రాజకీయ మనుగడ కోసమే పోలవరం ప్రాజెక్టు డిజైన్ ను సీమాంధ్ర రాజకీయ నాయకులు వివాదం చేస్తున్నారని కాంగ్రెసు తెలంగాణ ప్రాంత సీనియర్ నాయకుడు పాల్వాయి గోవర్దన్ రెడ్డి విమర్శించారు. సాగునీటి ప్రాజెక్టులపై, విద్యుత్తుపై కాంగ్రెసు తెలంగాణ ప్రాంత నాయకులు శనివారం శ్రకృష్ణ కమిటీ నిపుణుల బృందంతో సమావేశమయ్యారు. సమావేశానంతరం ఆయన మీడియా ప్రతినిధులతో మాట్లాడారు. ప్రస్తుత డిజైన్ లో పోలవరం ప్రాజెక్టు నిర్మాణం ఆమోదయోగ్యం కాదని, దానివల్ల తెలంగాణకు అన్యాయం జరుగుతుందని ఆయన అన్నారు.

కచ్చితంగా తెలంగాణ రాష్ట్రం ఇవ్వాల్సిందేనని ఆయన అన్నారు. సమైక్యంగా ఉంటే తెలంగాణకు అన్యాయం జరుగుతుందని ఆయన అన్నారు. తెలంగాణకు చెందిన ప్రజాప్రతినిధులు 40 శాతం మంది, సీమాంధ్ర ప్రజాప్రతినిధులు 60 శాతం మంది ఉన్నారని, మెజారిటీతోనే సీమాంధ్ర నాయకులు ఆగడాలకు పాల్పడుతున్నారని ఆయన అన్నారు.