పొట్టి శ్రీరాములు విగ్రహాంపై దాడి చేస్తే చేతులు నరికేస్తాం: టిజి వెంకటేష్

కర్నూలు: హైదరాబాదులోని తెలుగు విశ్వవిద్యాలయంలో గల పొట్టి శ్రీరాములు విగ్రహంపై దాడి జరిగిన సంఘటనపై కాంగ్రెసు కర్నూలు శాసనసభ్యుడు, రాయలసీమ హక్కుల వేదిక కన్వీనర్ టిజి వెంకటేష్ తీవ్రంగా ప్రతిస్పందించారు. అలాంటి సంఘటనలు మళ్లీ జరిగితే రాయలసీమ నేతలు మరోసారి ఫాక్షన్ అవతారమెత్తి దాడికి ఉసిగొల్పిన నాయకులు, దాడిచేసినవారి చేతులు నరికేస్తారని ఆయన హెచ్చరించారు. అందుకు దాడికి ఉసిగొల్పిన నాయకులే బాధ్యత వహించాల్సి ఉంటుందని ఆయన శనివారం మీడియా ప్రతినిధుల సమావేశంలో అన్నారు.

పొట్టిశ్రీరాములును ఆర్యవైశ్యులు దేవుడిగా భావిస్తారని, అటువంటి మహాత్ముడి విగ్రహాలపై దాడి జరిగితే వారి సెంటిమెంటు దెబ్బ తింటుందని ఆయన అన్నారు. తెలంగాణ ఉద్యమంలో నాయకులు గానీ వారి పిల్లలు గానీ చనిపోలేదని, అమాయకులే ఆత్మహత్యలు చేసుకున్నారని, ఈ విషయాన్ని తెలంగాణ విద్యార్థులు గుర్తించాలని ఆయన అన్నారు. హైదరాబాదును కేంద్ర పాలిత ప్రాంతంగా గానీ దేశం రెండో రాజధానిగా గానీ ప్రకటించాలని ఆయన కోరారు. వచ్చే నెల 7వ తేదీన రాయలసీమ సైనిక్ సేవాదళ్ ఏర్పడుతుందని ఆయన చెప్పారు.