సోనియా ఇంటి ముందు క్యూ కట్టిన ఎపి కాంగ్రెసు నాయకులు

న్యూఢిల్లీ‌: అఖిల భారత కాంగ్రెసు కమిటీ (ఎఐసిసి) అధ్యక్షురాలు సోనియా గాంధీ ఇంటి ముందు ఆంధ్రప్రదేశ్ కాంగ్రెసు నాయకులు క్యూ కట్టారు. ఆమెను అభినందించడానికి వారు బుధవారం బారులు తీరారు. 10 జనపథ్ వద్ద ఆంధ్రప్రదేశ్ కాంగ్రెసు నాయకుల సందడి కనిపించింది. కేంద్ర, రాష్ట్ర మంత్రులు, పార్లమెంటు సభ్యులు, శాసనసభ్యులు, పార్టీ నాయకులు సోనియా గాంధీని పలకరించడానికి క్యూ కట్టారు. ఆమెను కలిసి శుభాకాంక్షలు తెలిపారు. ఎఐసిసి అధ్యక్షురాలిగా నాలుగో సారి ఎన్నికైనందుకు వారు సోనియాను అభినందించారు.

సోనియాను కలిసిన వారిలో కేంద్ర మంత్రులు ఎస్ జైపాల్ రెడ్డి, దగ్గుబాటి పురంధేశ్వరి, పనబాక లక్ష్మి, ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ కూడా ఉన్నారు. వారెవరితోనూ సోనియా రాజకీయాల గురించి మాట్లాడలేదని సమాచారం. కేవలం మర్యాదపూర్వకంగా పలకరించేందుకు మాత్రమే ఆమె అవకాశం ఇచ్చారు. ఎఐసిసి సదస్సు మంగళవారం ముగియడంతో వారంతా ఢిల్లీలోనే ఉండి సోనియాను స్వయంగా కలిసి అభినందించారు.