వైయస్ రాజశేఖర రెడ్డి లక్ష కోట్లు అక్రమంగా సంపాదించారు: చంద్రబాబు

హైదరాబాద్: దివంగత నేత వైయస్ రాజశేఖర రెడ్డి అక్రమంగా లక్ష కోట్ల రూపాయలు అక్రమంగా సంపాదించారని తెలుగుదేశం పార్టీ అధ్యక్షుడు నారా చంద్రబాబు నాయుడు ఆరోపించారు. రంగారెడ్డి జిల్లాలో పర్యటిస్తున్న ఆయన బుధవారం ఉదయం ఎమ్మార్ ప్రాపర్టీస్ బాధితులను పరామర్శించారు. వైయస్ రాజశేఖర రెడ్డి ప్రభుత్వంలోని కుంభకోణాలు దేశాన్నే కుదిపేస్తున్నాయని ఆయన అన్నారు. తమ ప్రభుత్వ హయాంలో కమిటీలు వేసి ఒప్పందాలు పారదర్శకంగా చేశామని, వైయస్ అధికారంలోకి వచ్చిన తర్వాత వాటిని సమీక్షించే నెపంతో అన్నింటినీ తిరగదోడి, వాటిని రద్దు చేసి కొత్త ఒప్పందాలు చేసుకోవడం ద్వారా అవినీతికి పాల్పడ్డారని ఆయన విమర్శించారు. కొత్త ఒప్పందాలు చేసుకుని డబ్బులు దండుకున్నారని ఆయన అన్నారు.

వరద తాకిడి ప్రాంతాల్లో ప్రభుత్వం సహాయక చర్యలు చూస్తుంటే ప్రభుత్వం ఉందా అనే అనుమానం కలుగుతోందని ఆయన అన్నారు. ప్రభుత్వం వెంటనే సహాయక చర్యలు చేపట్టాలని ఆయన కోరారు. గతంలో వరద సహాయక చర్యలకు వేయి కోట్ల రూపాయలు ఇస్తామని ప్రధాని హామీ ఇచ్చారని, ఆ హామీని నిలబెట్టుకోలేకపోయారని ఆయన అన్నారు. ఇప్పుడైనా రాష్ట్ర ప్రభుత్వం కేంద్రంపై ఒత్తిడి తీసుకుని వచ్చి సహాయం రాబట్టాలని ఆయన అన్నారు. వరదలు, కరవు వచ్చినప్పుడు కేంద్రం నుంచి రాష్టానికి అన్యాయమే జరుగుతోందని ఆయన అన్నారు.