కోస్తాంధ్రకు తుఫాను ముప్పు: ప్రజల్లో అలుముకున్న భయాందోళనలు

విశాఖపట్నం: కోస్తాంధ్రకు పెను తుఫాను ముప్పు పొంచి ఉంది. తీరం వెంబడి 45 నుంచి 55 కిలోమీటర్ల వేగంతో ఈదురు గాలులు వీచే అవకాశం ఉంది. మరో నాలుగైదు రోజుల్లో వాయుగుండం ఆంధ్ర, ఒరిస్సా సరిహద్దులను తాకే అవకాశం ఉంది. విశాఖపట్నం జిల్లాలో మాత్రం మంగళవారం సాయంత్రం నుంచి వర్షాలు తగ్గుముఖం పట్టాయి. భారీ వర్షాలతో కోస్తాంధ్ర విలవిలలాడుతోంది. ప్రభుత్వం సహాయక చర్యలకు దిగింది. ఒక వైపు ఈశాన్య రుతుపవనాల ప్రభావం బలంగా ఉండగా, దక్షిణ అండమాన్‌, థాయ్‌లాండ్‌ పరిసర ప్రాంతాల్లో ఏర్పడిన తీవ్రమైన వాయుగుండం కారణంగా రెండ్రోజుల్లో కోస్తా ప్రాంతం మరో భయానక పెను తుపానును ఎదుర్కొనే అవకాశాలు ఉన్నట్లు వాతావరణ నిపుణులు అంచనా వేస్తున్నారు. తీవ్రమైన వాయుగుండం ఉన్న థాయ్‌లాండ్‌, అండమాన్‌ పరిసర ప్రాంతాల్లో దట్టమైన మేఘాలు కమ్ముకున్నాయి. అవి మైనస్‌ 40 నుంచి మైనస్‌ 70 డిగ్రీల వరకు ఉష్ణోగ్రతలున్న అత్యంత చల్లని మేఘాలు కావడంతో పలుచోట్ల భారీగా వర్షాలు కురిపిస్తున్నాయి. ఆ వాయుగుండం ప్రస్తుతం క్రమంగా భారతదేశం వైపు కదులుతుండడం వాతావరణ నిపుణులను తీవ్ర ఆందోళనకు గురిచేస్తోంది. వాటి కదలికలు పరిశీలిస్తే ఆంధ్రప్రదేశ్‌ కోస్తా పొడవునా ఎక్కడైనా తీరాన్ని తాకవచ్చని అంచనా వేస్తున్నారు.

మంగళవారం రాత్రి వరకు వాయుగుండం కేంద్రీకృతమైన తీరును పరిశీలిస్తే దాని తీవ్రత, అక్కడి మేఘాల పరిస్థితి భయాందోళనలను కలిగిస్తున్నాయి. అనూహ్య పరిణామలు ఏవైనా సంభవిస్తే తప్ప అది దిశ మార్చుకుని వేరే ప్రాంతాల వైపు తరలిపోవడం, బలహీనపడే అవకాశాలు కూడా చాలా తక్కువగా కనిపిస్తున్నాయని వాతావరణ నిపుణులు పేర్కొంటున్నారు. కాకినాడ, మచిలీపట్నం, నెల్లూరు, ఒంగోలుల మధ్య తీరం దాటే అవకాశాలున్నట్లు అంచనా. వాయుగుండం పెను తుపానుగా మారి రాష్ట్రంలో తీరాన్ని దాటితే కోస్తాకు ఆనుకుని ఉన్న పలు ప్రాంతాలు అల్లకల్లోలమై పోతాయని హెచ్చరిస్తున్నారు.

రాష్ట్రంలో కురిసిన భారీ వర్షాల వల్ల 20 మంది చనిపోయినట్లు ప్రభుత్వం ప్రకటించింది. వర్షాలకుతోడు లోతట్టు ప్రాంతాలు జలమయం కావడం వల్ల ఇళ్లల్లోకి నీళ్లు చేరాయి. వేలాది ఇళ్లు నీళ్లలో ఉండిపోయాయి. 2,698 ఇళ్లు పూర్తిగా నేలమట్టం అయ్యాయి. 1,508 ఇళ్లు బాగా దెబ్బతిన్నాయి. తూర్పుగోదావరి జిల్లాలో ఇళ్లకు ఎక్కువగా నష్టం వాటిల్లింది.