మంత్రులపై నిప్పులు చెరిగిన ముఖ్యమంత్రి రోశయ్య

హైదరాబాద్: మంత్రులపై ముఖ్యమంత్రి కె. రోశయ్య నిప్పులు చెరిగారు. బుధవారం సాయంత్రం ముఖ్యమంత్రి కె. రోశయ్య అధ్యక్షతన జరిగిన మంత్రివర్గ సమావేశం ఆద్యంతం వాడిగా వేడిగా సాగింది. మంత్రుల మధ్య వాగ్వివాదాలు చెలరేగాయి. పేదలకు సంబంధించిన క్రమబద్దీకరణ స్థలాన్ని 80 గజాల నుంచి 120 గజాలకు పెంచాలని మంత్రి దానం నాగేందర్ కోరారు. దాన్ని పంచాయతీరాజ్ శాఖ మంత్రి బొత్స సత్యనారాయణ వ్యతిరేకించారు. ఇరువురి మధ్య తీవ్ర వాగ్వివాదం చెలరేగింది. అదే సమయంలో సినిమా పైరసీపై కూడా బొత్స సత్యనారాయణ వాదానికి దిగారు. దాన్ని మంత్రుల కమిటీకి నివేదించడంతో మంత్రి వర్గ సమావేశం చల్లబడింది.

అయితే, ముఖ్యమంత్రి కె. రోశయ్య మాత్రం మంత్రులపై తీవ్ర ఆగ్రహం వ్యక్తం చేశారు. మంత్రివర్గ సమావేశం వివరాలను మీడియాకు లీక్ చేస్తున్నారంటూ ఆయన విరుచుకుపడ్డారు. మంత్రివర్గంలో జరిగిన ప్రతి విషయం ఉన్నదున్నట్లుగా పత్రికల్లో వస్తోందని, మంత్రులకు సత్ప్రవర్తన ముఖ్యమని ఆయన అన్నారు. క్యారెక్టర్ లెస్ మంత్రులున్నారంటూ ఆయన వ్యాఖ్యానించారు. తమ మీద నమ్మకం లేకపోతే తమ ఫోన్లపై నిఘా పెట్టాలని మంత్రి వట్టి వసంతకుమార్ అన్నారు. దానికి ముఖ్యమంత్రి తీవ్రంగా ప్రతిస్పందిస్తూ అదెంత పని అని అన్నారు. ఈ సంభాషణ కూడా ఉన్నదున్నట్లుగా పత్రికల్లో వస్తుందని మంత్రి ముఖేష్ అన్నారు.