ఆనం బ్రదర్సుపై జగన్ ఓదార్పులో అంబటి రాంబాబు ధ్వజం

నెల్లూరు: దివంగత వైఎస్ రాజశేఖర్ రెడ్డి ముఖ్యమంత్రిగా ఉన్నప్పుడు ఆయన దయాదాక్షిణ్యాలమీద బతికిన వాళ్లు ఇప్పుడు కడప పార్లమెంటు సభ్యుడు వైఎస్ జగన్మోహన్ రెడ్డి చేపడుతున్న ఓదార్పు యాత్రను అడ్డుకుంటున్నారని కాంగ్రెస్ నాయకుడు అంబటి రాంబాబు విమర్శించారు. నెల్లూరు జిల్లా మంత్రులు ఆనం రామనారాయణరెడ్డి, ఆనం వివేకానందరెడ్డిలను ఉద్దేశించి ఆయన తీవ్రస్థాయిలో ధ్వజమెత్తారు. వైఎస్ చనిపోయాక ఆయన మీద బెంగతో చనిపోయిన వారిని జగన్ ఓదార్చుతుంటే కొందరు అడ్డుకుంటాన్నారని మంత్రులు ఆనం బ్రదర్సును ఉద్దేశించి ఆయన అన్నాడు. మంత్రివర్గంలో స్థానం లేకున్నా, ప్రభుత్వ సహకారం లేకున్నా జగన్ కు వస్తున్న స్పందన చూసి కాంగ్రెస్ నాయకులే అడ్డుపడుతున్నారని అన్నారు.

వైఎస్ జగన్ కొత్త పెనుతుఫాను సృష్టించడానికి వస్తున్నాడని ఆయన అన్నారు. ప్రజల అభిమానం ఉన్నంతకాలం ఎవరు ఎలాంటి అవాంతరాలు సృష్టించినా ఎండైనా,వానైనా, తుఫాను వచ్చినా ముందుకు దూకుసు పోతాడని అన్నారు. తెలుగు ప్రజలకు నిజమైన హీరో వైఎస్ జగనేనని ఆయన ప్రశంసించారు.