మాజీమంత్రి దండు శివరామరాజు కన్నుమూత: చంద్రబాబు సంతాపం

ఏలూరు: మాజీమంత్రి, తెలుగుదేశం పార్టీ నాయకుడు దండు శివరామరాజు ఆదివారం మధ్యాహ్నం ఆయన స్వగ్రామంలో మృతి చెందారు. గత కొన్నాళ్లుగా అస్వస్థతతో ఉన్న శివరామరాజును నిమ్స్ లో చేర్పించారు. ఇటీవలే నిమ్స్ నుండి తీసుకెళ్లారు. పశ్చిమ గోదావరి జిల్లాలోని నిడమర్రు మండలం మండలపర్రులో ఆయన తుది శ్వాస విడిచారు. అనారోగ్యం కారణంగానే ఆయన మరణించారు.

దండు తెలుగుదేశం పార్టీ హయాంలో దేవాదాయ శాఖమంత్రిగా బాధ్యతలు నిర్వహించారు. శివరామరాజుకు వారసులు ఎవరూ లేకపోవటంతో ఆయన తన ఆస్తులను ధారాదత్తం చేశారు. ఆయన వయస్సు 72. శివరామరాజు గతంలో రెండుసార్లు శాసనమండలి సభ్యుడిగా, మూడుసార్లు శాసనసభ్యుడిగా పని చేశారు. దండు మృతి పట్ల తెలుగుదేశం పార్టీ అధ్యక్షుడు నారా చంద్రబాబు నాయుడు ఆయన కుటుంబ సభ్యులకు సంతాపం తెలిపారు.