దేశ చరిత్రలో ఇలాంటి అవినీతిపరుడు లేడు: వెంకయ్యనాయుడు

నెల్లూరు: కాంగ్రెస్ ప్రభుత్వం పూర్తిగా అవినీతిలో కూరుకుపోయిందని భారతీయ జనతా పార్టీ సీనియర్ నాయకుడు వెంకయ్యనాయుడు అన్నారు. 2జీ స్పెక్ట్రమ్‌ కుంభకోణంపై ప్రభుత్వం వెంటనే జేపీసీతో విచారణ జరిపించి రాజాపై చర్యలు తీసుకోవాలని భాజపా సీనియర్‌ నేత వెంకయ్యనాయుడు ఆదివారం శ్రీ పొట్టిశ్రీరాములు నెల్లూరు జిల్లాలో విలేకరులతో మాట్లాడుతూ డిమాండ్‌ చేశారు. దేశ చరిత్రలో ఇలాంటి అవినీతిపరుడైన నాయకుడు లేడన్నారు.

కాగ్‌ నిగ్గు తేల్చిన 2జీ స్పెక్ట్రమ్‌, ఆదర్శ్‌ సొసైటీ, కామన్వెల్త్‌ క్రీడల్లో అవినీతిపై విచారణ జరిపించాలని ఆయన అన్నారు. కాంగ్రెస్ తమ నాయకులు చేస్తున్న అవినీతిని వెనకేసుకొస్తూ ప్రజా ధనాన్ని లూటీ చేస్తుందన్నారు. 2జి స్పెక్ర్ విషయంపై ప్రభుత్వం వెంటనే ఎంక్వయిరీ వేయకుంటే భారతీయ జనతా పార్టీ ఆధ్వర్యంలో పార్లమెంటును స్తంభింపచేస్తామని ఆయన హెచ్చరించారు. అదర్శ్ కుంభకోణంలో ముఖ్యమంత్రిని మార్చగానే అవినీతి మాసిపోయినట్టు కేంద్రం భావిస్తుందని విమర్శించారు.దేశానికి అవసరమైన ధాన్యాన్ని ఉంచుకొని మిగతా ధాన్యం ఎగుమతికి అనుమతించాలని అన్నారు. పోలవరం ప్రాజెక్టు కోసం రాజకీయాలను పక్కనబెట్టి కేంద్రంపై ఒత్తిడి తేవాన్నారు.