కేశవరావు కావూరి వివాదం: రంగంలోకి దిగిన జైపాల్ రెడ్డి

న్యూఢిల్లీ: కాంగ్రెసు తెలంగాణ ప్రాంత పార్లమెంటు సభ్యుడు కె. కేశవరావు, సీమాంధ్ర పార్లమెంటు సభ్యుడు కావూరి సాంబశివరావు మధ్య సయోధ్య కుదిర్చేందుకు కేంద్ర మంత్రి ఎస్ జైపాల్ రెడ్డి రంగంలోకి దిగారు. వారిద్దరి మధ్య సయోధ్య కుదిర్చేందుకు ఆయన మధ్యవర్తిత్వం చేస్తున్నారు. పోలవరం ప్రాజెక్టు నిర్వాసితుల విషయంలో కావూరికి, కెకెకు మధ్య తీవ్ర వివాదం చెలరేగిన విషయం తెలిసిందే. కావూరి సాంబశివరావుకు, కేశవరావుకు జైపాల్ రెడ్డి ఫోన్ చేసి మాట్లాడారు.

వివాదాన్ని సాగదీయవద్దని, ఇంతటి ముగించాలని వారిద్దరికి ఆయన హితవు పలికారు. వివాదం కొనసాగితే పార్టీకి నష్టం వాటిల్లుతుందని ఆయన వారికి చెప్పారు. గిరిజనులను అవమానించారని కేశవరావు కావూరిపై చేసిన వ్యాఖ్యకు కావూరి సాంబశివ రావు తీవ్ర వ్యాఖ్యలు చేశారు. తెలంగాణ నాయకులు బ్లాక్ మెయిల్ చేసి బతుకుతున్నారని, వారి బతుకే అంత అని, వారు ఏనాడైనా ప్రజల్లోకి వెళ్లారా అని ఆయన అన్నారు. దీంతో వివాదం తీవ్ర రూపం దాల్చే పరిస్థితి ఏర్పడింది. దీంతో జైపాల్ రెడ్డి రంగంలోకి దిగారు.