జగన్ పై ఉన్న శ్రద్ధ పార్టీపై లేదు: మొయిలీపై పాల్వాయి ఫైర్

హైదరాబాద్: డబ్బులు దండుకోవడానికే మా పార్టీ వారు కొందరు తెలుగు దేశం పార్టీ వారితో కుమ్మక్కయి ప్రాజెక్టు కాంట్రాక్టులు దక్కించుకొని పోలవరం ప్రాజెక్టును ప్రారంభిస్తున్నారని కాంగ్రెసు పార్టీ సీనియర్ నాయకుడు పాల్వాయి గోవర్ధన్ రెడ్డి ఆరోపించారు. రాష్ట్రంలోని ఇంజినీర్లు రాజకీయ నాయకులు ఎలా అడిగితే అలా ప్రాజెక్టులు డిజైన్ చేసి ఇస్తున్నారన్నారు. పోలవరం ఇప్పటి డిజైన్ సరికాదని ఆయన తన అభిప్రాయాన్ని వెలిబుచ్చారు. ఇప్పటి డిజైన్ మారిస్తేనే అది పూర్తవుతుందన్నారు.

పార్టీలో పార్లమెంటు సభ్యుల మధ్య సమన్వయ లోపానికి మా పార్టీ వ్యవహారాల ఇంచార్జి వీరప్ప మొయిలే కారణమన్నారు. ఆయన కడప పార్లమెంటు సభ్యుడు వైయస్ జగన్మోహన్ రెడ్డిపై పెట్టిన శ్రద్ధ పార్టీపై పెట్టి ఉంటే పార్లమెంటు సభ్యలు మధ్య ఈ స్పర్థలు వచ్చి ఉండేవి కావని ఆయన ఆశాభావం వ్యక్తం చేశారు. ఇప్పటికైనా ఆయన రాష్ట్ర పార్టీపై శ్రద్ధ చూపి నేతలమధ్య సమన్వయానికి కృషి చేయాలన్నారు.