కాంబోడియాలో తొక్కిసలాట: 345 మంది దుర్మరణం

నామ్‌ఫెన్: కాంబోడియాలో పెను విషాదం చోటు చేసుకుంది. కాంబోడియా రాజధాని నామ్‌ఫెన్‌లో జలోత్సవం సందర్భంగా సోమవారం జరిగిన తొక్కిసలాటలో 345 మంది మరణించారు. వీరిలో 240 మందికిపై మహిళలే ఉన్నారు. మరో 329 మంది తీవ్రంగా గాయపడ్డారు. కాంబోడియాలో యేటా 3రోజుల పాటు జరిగే జలోత్సవానికి చిన్న ద్వీపంలో దాదాపు 20 లక్షల మందికి పైగా హాజరవుతారు. పడవ పోటీల అనంతరం పదిమంది స్పృహ తప్పి పడిపోవడంతో వంతెనపై ఒక్కసారిగా తొక్కిసలాట జరిగింది. దీంతో చాలామంది వంతెనపై నుంచి నీళ్లలో పడి మరణించగా, భయంతో పరుగులు తీస్తున్నవారి కాళ్ల కింద పడి నలిగి మరికొందరు చనిపోయారు.

ప్రమాదం సంభవించిన సమయంలో చాలా మంది అవుట్ డోర్ రెస్టారెంట్ లో భోజనాలు చేస్తున్నారు. చాలా మంది నగరానికి తిరిగి వెళ్లేందుకు వంతెన దాటుతున్నారు. ప్రమాదానికి ప్రధాని హున్ సేన్ క్షమాపణలు చెప్పారు. సంఘటనపై దర్యాప్తునకు ఆదేశించారు. శవాలు గుట్టలు గుట్టలుగా పడి ఉన్నాయి. పోల్ పాట్ పాలన తర్వాత గత 31 ఏళ్లలో ఇదే అతి పెద్ద ప్రమాదమని ఆయన అన్నారు. మేర్ రఫ్ విప్లవంలో 1.7 మిలియన్ల మంది మరణించిన విషయాన్ని ఆయన గుర్తు చేశారు.