కడప ఎంపీ జగన్ ది గురువింద గింజ సామెత: పనబాక లక్ష్మి

న్యూఢిల్లీ: కడప పార్లమెంటు సభ్యుడు వైయస్ జగన్మోహన్ రెడ్డికి సంబంధించిన సాక్షి పత్రికలో ఏఐసిసి అధ్యక్షురాలు సోనియాగాంధీకి వ్యతిరేకంగా కథనాలు రావటం గురువింద గింజ సామెతను గుర్తుకు తెస్తుందని కేంద్ర సహాయమంత్రి పనబాక లక్ష్మి మంగళవారం విలేకరుల సమావేశంలో న్యూడిల్లీలో అన్నారు. ఆయన ఏ పార్టీ ద్వారా ఇంతస్థాయికి ఎదిగారో గుర్తుంచుకోవాలన్నారు. సోనియాగాంధీ ప్రపంచంలోని అతి శక్తివంతమైన మహిళల్లో చోటు చేసుకున్నారని ఆమె గుర్తు చేశారు. సోనియా గాంధీపై వచ్చిన కథనాల్లో ఏమాత్రం వాస్తవం లేదని అమె అన్నారు.

సోనియాకు వ్యతిరేకంగా వార్తలు సాక్షిలో రావడం విచారకరమన్నారు. సోనియాను ఎవరో పొగడాల్సిన అవసరం లేదన్నారు. ఆమె ఓటమి ఎరుగని వ్యక్తి అని పొగిడారు. రాష్టంలోని ఇమేజ్ కి, దేశంలోని ఇమేజ్ కి తేడా ఉండుందని ఆమె చెప్పారు. అయినా సోనియాగాంధీ వంటి వ్యక్తిని విమర్శించే స్థాయి, అర్హత సాక్షి యాజమాన్యానికి లేవన్నారు. దివంగత ముఖ్యమంత్రి వైయస్ రాజశేఖరరెడ్డి బతికి ఉంటే సాక్షిలో సోనియాకు వ్యతిరేకంగా వచ్చిన కథనాలు చూసి ఏం చేసేవారోనని అన్నారు.

వార్తలు రాసేముందు తెలుసుకొని రాయాలన్నారు. వైయస్ రాజశేఖరరెడ్డి జగన్ కో, సాక్షికో సంబంధించిన వ్యక్తి కాదని ఆయన ప్రజల సొత్తు అని అన్నారు. వైయస్ మృతి చెందే వరకు కాంగ్రెస్ కోసం కృషి చేశారన్నారు. రాష్ట్రంలో వైయస్ రాజశేఖర్ రెడ్డియే కాంగ్రెస్ ను అధికారంలోకి తెచ్చాడని అనడం పట్ల ఆమె అభ్యంతరం వ్యక్తం చేశారు. అందరి నేతల్లా ఆయన పాత్ర కూడా ఉందన్నట్టు స్పందించారు.