ఏఐసిసి అధ్యక్షురాలు సోనియాగాంధీని కలవలేదు: రోశయ్య

న్యూఢిల్లీ: నేను ఏఐసిసి అధ్యక్షురాలు సోనియాగాంధీని కలువలేదని ముఖ్యమంత్రి కొణిజేటి రోశయ్య మంగళవారం మీడియా ప్రతినిధులతో తెలిపారు. సోనియాతో తాను కలిసినట్లు వస్తున్న వార్తల్లో నిజం లేదన్నారు. కలిస్తే కలిశానని చెప్తా కదా అని ఆయన అన్నారు. తాను కేవలం హోంమంత్రి చిదంబరాన్ని, అహ్మద్ పటేల్ ను మాత్రమే కలిసినట్లు చెబుతున్నారు. సోనియాతో పావుగంట సమావేశమయినట్లు వస్తున్న వార్తలను ఆయన ఖండించారు.

హోంమంత్రి చిదంబరాన్ని కలిసి హైదరాబాద్ ఫ్రీజోన్ అంశానికి సంబంధించిన 14ఎఫ్ పై చర్చించినట్లు తెలిపారు. 14ఎఫ్ పై చిదంబరం సానుకూలంగా స్పందించారన్నారు. అయితే లీగల్ ఒపీనియన్ తీసుకోవాలని పార్టీ అధిష్టానానికి 18వ తారీఖున లేఖ రాశానని తెలిపారు. మంత్రివర్గ విస్తరణపై తాను ఇప్పుడు ఏమీ మాట్లాడనన్నారు. ఆ విషయం చర్చకు రాలేదని తెలిపారు. కాగా ముఖ్యమంత్రి 4.30 గంటల ప్రాంతంలో హైదరాబాదుకు తిరుగు ప్రయాణమవుతారు.